Valent nostri omnes, per Dei gratiam.... Vix unus utitur linteis cum decumbit. Quod superest nobis temporis a propria et proximorum salute id totum in excolenda terra insumitur. Longe alia fuissent virtutum incrementa, si alium Nostri non desiderassent superiorem. Facile est Paternitati Vestræ remedium adhibere, longe melius obsequentis quam imperantis personam sustineo. Dabit hoc mihi ut bene spero Paternitas Vestra a qua id, qua possum animi demissione, peto, nec hujus remedii defectu remorabitur diutius alacritatem nostrorum in augendis virtutibus. E Gallia missi sunt ad nos hoc anno operarii primum hic domicilium Societatis erecturi quod omnino necessarium indicavimus propter Gallos nostros hic commorantes et nusquam alibi. Erigentur postea in aliis nationibus in quibus major speratur fructus. Certas enim et statas sedes habent, ad eas brevi missuri sumus unum e nostris vel duos potius, nimirum Patrem Joannem de Brebeuf et Patrem Annam de Noue, quorum missio si succedat lætissimus aperitur Evangelio campus; barbarorum opera eo deducendi sunt, neque enim aliis vectoribus uti possunt. Cum bona superiorum venia redit in Galliam Pater Philibertus Noyrot, hoc totum negotium ut hactenus fecit promoturus. Indiget Paternitatis Vestræ auctoritate ut libere possit agere cum iis qui res nostras curant. Facessunt ipsi aliquid negotii Lutetiæ Patres nostri, nescio quam ob rem, nonnihil videntur alieni ab hac missione, cui nisi favisset bonæ memoriæ Pater Cottonus omnino jacuissent res nostræ.... Verum quia rediturus est ineunte vere Pater Noyrot, omnino alius e nostris erit necessarius Lutetiæ vel Rothomagi qui in ipsius locum sufficiatur et rerum nostrarum curam suscipiat, necessaria singulis annis mittat et litteras nostras accipiat; si tamen ita judicaverit Paternitas Vestra. Septem ergo hic residui erimus. Patres quatuor: P. Enemundus Masse, admonitor et confessarius, P. Joannes de Brebeuf, P. Annas de Noue et ego. Coadjutores vero tres: Gilbertus Burel, Joannes Goffestre et Franciscus Charreton, parati omnes ad quosvis labores pro Dei gloria suscipiendos. Sanctissimis Paternitatis Vestræ Sacrificiis commendant se omnes. P. V. filius humillimus Carolus Lalemant. E Nova Francia Cal. Aug.