Or comme dans les grandes estenduës de ces païs cy, il y a quantité de nations toutes barbares, aussi se font-elles la guerre les vnes les autres fort souuent. A nostre arriuée à Tadoussac les Sauuages reuenoient de la guerre contre les Hiroquois, & en auoient pris neuf, ceux de Quebec en tenoient six, & ceux de Tadoussac trois. Monsieur Emery de Caën les fut voir, il desiroit sauuer la vie au plus ieune, ie plaiday fort pour tous trois, mais on me dit qu'il falloit de grands presens, & ie n'en auois point. Arriuez donc que nous fumes aux cabanes des Sauuages, qui sont faites de perches, & couuertes d'écorces assez grossierement, le faiste n'est point couuert pour receuoir le iour par là, & donner [21] yssuë à la fumée. Nous entrames dans celle du Capitaine de guerre qui estoit longuette; il y auoit trois feux au milieu, les vns éloignez des autres de cinq ou six pieds. Estans entrez nous nous assimes de part & d'autre à plate terre, couuerte de petite branches de sapin; ils n'ont point d'autres sieges. Cela fait, on fit venir les prisonniers qui s'assirent les vns aupres des autres; le plus âgé auoit plus de 60. ans, le second enuiron 30. le troisiesme estoit vn ieune garçon de 15. à 16. ans. Ils se mirent tous à chanter, pour montrer qu'ils ne craignoiẽt point la mort, quoy que tres-cruelle; leur chant me semble fort desagreable, la cadence finissoit tousiours par ces aspirations reïterées oh! oh! oh! ah! ah! ah! hem! hem! hem! _&c._ Apres qu'ils eurent bien chanté, on les fit dancer les vns apres les autres, le plus âgé se leue le premier, & commance [22] à marcher du long de la cabane tout nud, hors mis, comme i'ay dit, vn morceau de peau qui luy couuroit ce que la nature a caché. Il frappoit des pieds la terre en marchant, & chantoit incessamment. Voyla toute sa dance, pendant laquelle tous les autres Sauuages qui estoient dans la cabane frappoient des mains ou se battoient la cuisse, tirans cette aspiration du fond de l'estomach a--ah, a--ah, a--ah, & puis quand le prisonnier s'arrestoit, ils crioient o--oh! o--oh! o--oh! & l'vn se rasseant, l'autre se mettoit à dancer. Monsieur de Caën demanda quand on les feroit mourir, ils respondirent le lendemain. Ie les fut voir encor, & ie trouuay trois pieux de bois dressez, où on les deuoit executer: mais il vint nouuelle de Quebec qu'on traittoit de paix auec les Hiroquois, & qu'il faudroit peut-estre rendre les prisonniers, ainsi [23] leur mort fut retardée. Il n'y a cruauté semblable à celle qu'ils exercent contre leurs ennemis. Si tost qu'ils les ont pris ils leurs arrachent les ongles à belles dents; ie vis les doigts de ces pauures miserables qui me faisoient pitié, & vne playe assez grande au bras de l'vn d'eux, on me dit que c'estoit vne morsure de celuy qui l'auoit pris, l'autre auoit vne partie du doigt emporté, & ie luy demanday si le feu luy auoit fait cela, ie croyois que ce fust vne bruslure, il me fit signe qu'on luy auoit emporté la piece auec les dents.