auec les Anglois, & puis auec les Sauuages de sa natiõ: Dieu vueille que la cognoissance de leur heresie & de leurs vices (car il auouë que les Anglois sont dissolus iusques au dernier point) n'empesche pas que la premiere semence qu'on a iettée dãs son ame ne produise les fruits que le Ciel attend, & que nous esperons. Mais venons au Conseil de sa natiõ. Estant assemblé, le sieur de Chãplain nous fit appeller. I'ay appris que Louïs XI. tint vn iour son conseil de guerre en la campagne, n'ayant pour throsne ou pour chaire qu'vne piece de bois, ou vn arbre abbattu qu'il rẽcontra par fortune au milieu d'vn champ. Voila le portraict du conseil des Hurons, excepté qu'ils sont assis encore vn peu plus bas, c'est à dire à platte terre, tous pesle-meslez sans [273 i.e., 173] aucun ordre, sinon que ceux d'vne nation ou village se mettent les vns pres des autres, pendant qu'on dispute en France de la preseance, & qu'õ s'amuse à presenter vne chaire à celuy qu'on iugeroit impertinent de l'accepter, on auroit acheué, & conclu trois cōseils parmy les Sauuages, qui au bout du conte ne laissent point d'estre fort graues, & serieux dans leurs harangues assez longues: ils estoient enuiron soixante hommes en leur assemblée sans conter la ieunesse qui estoit esparse çà & là. Chaqu'vn s'estant placé le mieux qu'il pût, vn Capitaine commença sa harangue, le sommaire estoit que la nation des Hurons, des Ours & autres estoient assemblées pour tenir cõseil auec les Frãcois. Sa harãgue finie tous les Sauuages pour approbation de ce discours tirerent du profond de l'estomach ceste aspiration, _ho, ho, ho_, releuant [374 i.e., 174] fort la derniere syllabe. Ceste harangue finie, & le conseil declaré legitimemẽt assemblé par cette belle approbation, le mesme Capitaine en recommença vne autre, qui ne vouloit dire autre chose sinon qu'ils estoyẽt venus voir leurs amis & leurs freres les François, & pour affermir ceste amitié & alliance, qu'ils offroient tous des presens à leur capitaine le Sieur de Champlain, & là dessus luy presenterent trois paquets de robbes de castor. La conclusion fut que tous les Sauuages approuuerent ceste harangue par leur aspiratiō de ho! ho! reïterée, & les François par l'acceptation des presens qu'on offroit. Le mesme capitaine poursuivãt son discours, disant que tous ces peuples se resiouïssoyent du retour du Sieur de Champlain, & qu'ils se venoyent tous chauffer à son feu: le bois qu'ils y mirent furent encore [275 i.e., 175] deux ou trois paquets de robbes de castor dont ils luy firent present. Sur l'heure mesme ce troisiesme discours fut approuué comme le second.