Le dernier de Iuillet iour de feste de nostre S. Pere Ignace, le Sieur de Champlain & les capitaines des vaisseaux qui estoyent icy, estans venus [181] gagner les Indulgences en nostre petite Chapelle, quantité de Hurons nous venans voir, nous fusmes contraints de fermer nostre porte, & de leur dire qu'on faisoit festin, afin de les empescher d'entrer. C'est vne maxime entr'eux qui'ils ne mettront iamais le pied dans la cabane de celuy qui fait festin: il n'y a que les conuiez à qui cela soit loisible. Or neãtmoins comme ils desiroient de voir, l'vn d'eux ayant mis la teste à vne fenestre appella ses compagnons, & le sieur de Champlain prenant plaisir à les voir admirer, donna à l'vn d'eux vn morceau d'écorce de citron, il en gouste, & commence à s'escrier, ô que cela est bon! Il en depart a ceux qui estoient auec luy, qui furent saisis de la mesme admiration: ils demanderent ce que c'estoit, le sieur de Champlain leur dit en riant, que c'estoit de l'écorce des citroüilles de [182] France, les voila bien estonnés, & cōmencēt à se dire les vns aux autres, que nos citroüilles estoient admirables: là dessus ceux qui n'en auoient point gousté se mettent à la fenestre, & demandent au sieur de Chāplain si toutes les citrouilles estoient mangées, & qu'ils voudroient bien en taster, pour en porter les nouuelles en leur païs. Ie vous laisse à penser si tous ceux qui estoient dans la chambre se mirent à rire. On les fit entrer apres les Vespres dans la Chappelle qui estoit gentiment ornée selon nos petites richesses, ce nous est vn contentement bien sensible de voir que nostre Seigneur ait vne petite maison au milieu des grands bois que nous habitons: c'est icy qu'ils furent estonnés tout à fait: nous auions mis les Images de S. Ignace, & de S. Xauier sur nostre autel, ils les regardoient auec estonnement: ils croyoient que [183] ce fussent personnes viuantes, ils demandoient si c'estoient des Ondaqui: le mot _Oqui_ & au plurier _Ondaqui_ signifie entre eux quelque diuinité, en vn mot ce qu'ils recognoissent par dessus la nature humaine: ils demandoient encor si le tabernacle estoit leur maison, & si ces _Ondaqui_ s'habilloient des ornemens qu'ils voyoient à l'ẽtour de l'Autel. Le Pere Brebeuf leur aiant expliqué ce que representoient ces Images, ils mettoient la main à la bouche, & se la frappoient en signe d'estonnement; Il y auoit trois Images de la Vierge, en diuers endroits: ils demanderent successiuement de l'vne apres l'autre qui c'estoit: le Pere leur disant à toutes que c'estoit la mere de celuy qui a tout fait, ils se mirent à rire, demandans comment cela se pouuoit faire qu'vne seule persõne eut trois meres: car ils prenoient ces trois figures [184] pour la representation de trois personnes differentes, on leur fit entendre que ces trois images figuraient la mesme persõne. ô qu'il seroit bon d'auoir tous les mysteres de nostre foy bien figures! ces images aident grandement, & parlent desia d'elles mesmes.