homme qui apporte deux paux ou pieux fort pointus, mon hoste prepare le sort composé de petits bois formez en langue de serpẽt des deux costez, de fers de flesches, de morceaux de cousteaux rompus, d'vn fer replié comme vn gros hameçon, & d'autres choses semblables, on enuelopa tout cela dans vn morceau de cuir: Cela fait, le sorcier prend son tambour, tous se mettent à chanter & hurler, & faire le tintamarre que i'ay remarqué cy dessus: apres quelques chansons, la femme qui estoit demeurée se leue, & tourne tout à l'entour de la cabane par dedans, passant par deriere le [76] dos de tous tant que nous estions. S'estant rassisse, le magicien prend ces deux pieux, puis designant certain endroit, commence à dire; voila sa teste (ie crois qu'il entendoit de l'homme qu'il vouloit tuer) puis de toutes ces forces, il plante ces pieux en terre, les faisant regarder vers l'endroict, où il croioit qu'estoit ce Canadien. Là dessus mon hoste va ayder son frere, il fait vne assez grande fosse en terre auec ces pieux: cependant les chants & autres bruits continuoient incessemment. La fosse faite, les pieux plantez, le valet du sorcier, i'entens l'Apostat, va querir vne espée, & le sorcier en frappe l'vn de ces paux, puis descend dans la fosse, tenant la posture d'vn homme animé qui tire de grands coups d'espée & de poignard; car il auoit l'vn & l'autre dans cette action d'homme furieux & enragé. Le sorcier prend le sort enuelopé de peau, le met dans la fosse, & redouble les coups d'espée à mesme temps qu'on redoubloit le tintamarre.