Ils croyent que la Lune de Feurier est plus lõgue de plusieurs iours que les autres, aussi la nomment ils la grande Lune; Ie leur ay demanday d'où venoit l'Eclypse de Lune & de Soleil; ils m'ont respondu que la Lune s'éclypsoit ou paroissoit noire, à cause qu'elle tenoit son fils entre ses bras, qui empeschoit que l'on ne vist sa clarté. Si la Lune a vn fils, elle est mariée, ou l'a été, leur dis-je, oüy dea, me dirent ils, le Soleil est son mary qui marche tout le iour, & elle toute la nuict; & s'il s'eclypse, ou s'il s'obscurcit, c'est qu'il prend aussi par fois le fils qu'il a eu de [97] la Lune entre ses bras: oüy, mais ny la Lune ny le Soleil n'ont point de bras, leur disois-je, tu n'as point d'esprit: ils tiẽnent tousiours leur arcs bandés deuant eux, voila pourquoy leurs bras ne paroissent point; & sur qui veulent ils tirer? hé qu'en sçauons nous. Ie leur demanday que vouloient dire ces taches qui se font voir en la Lune; tu ne sçay riẽ du tout, me disoient ils; c'est vn bonet qui luy couure la teste, & non pas des taches. Ie m'enquis pourquoy le fils du Soleil & de la Lune n'estoit pas luisant comme ses parents, ains noir & obscur; nous n'en sçauons rien, me firent ils, si nous auions esté au Ciel nous te respondrions. Au reste ils croyent qu'ils viẽt quelquefois en terre, & quand il se pourmene en leur pays, ils meurent en grand nõbre. Ie leur ay demandé s'ils n'auoiẽt point veu de Cometes, ces Estoilles à longue queuë, & ce que c'estoit; nous en auons veu, me dirent ils, c'est vn animal qui a vne grande queuë, 4. pieds, & une teste, nous voyons tous cela, disoiẽt-ils.