La septiesme personne que nous auons mis au nombre des enfans de Dieu, par le Sacrement de Baptesme, c'est la mere du petit Sauuage, que nous auions nommé bien-venu; elle s'appelloit en Sauuage _Ouroutiuoucoueu_, & maintenant on l'appelle Marie, ce beau nom luy a esté donné, suiuant le vœu qu'auoit fait autresfois le R. Pere Charles l'Allement, que la premiere Canadienne que nous baptizerions, porteroit le nom de la saincte Vierge, & le premier Sauuage, celuy de [28] de son glorieux Espoux sainct Ioseph, nous n'auions point cognoissance de ce vœu, quand les autres ont esté baptizés. I'espere que dans fort peu de iours il sera entierement accomply: mais pour retourner à nostre nouuelle Chrestienne, l'ayant trouuée proche du fort de nos François, abandonnée de ses gens, pource qu'elle estoit malade, ie luy demanday qui la nourrissoit, elle me respondit que les François luy donnoient quelque morceau de pain, & que quelques vns reuenans de la chasse, luy iettoient par fois en passant vne tourterelle, si vous vous voulez cabaner, luy dis-je, proche de nostre maison, nous vous nourrirõs, & vous enseignerons le chemin du Ciel; Elle me repartit d'vne voix languissante, car elle estoit fort mal, helas! i'y voudrois bien aller, mais ie ne sçaurois plus marcher, aye pitié de moy, enuoye moy querir dans vn Canot. Ie ny manquay pas le lendemain matin 23. Iuillet ie la fis apporter proche de nostre maison; la pauure fẽme me demãdoit bien si elle n'entreroit point chez nous, elle s'attẽdoit que nous luy feriõs la mesme [29] charité que nous auions fait aux deux premiers baptizés, mais ie luy respõdis qu'elle estoit fẽme, & que nous ne pouuions pas la loger dãs nôtre maisõnette qui est fort petite, que neãtmoins nous luy porterions à manger dans sa Cabane, & que tous les iours ie l'irois voir pour l'instruire, elle fut contente. Quand ie commençay à luy parler de la saincte Trinité, disant, que le Pere, & le F[i]ls & le sainct Esprit, n'estoient qu'vn Dieu qui a tout fait: ie le sçay bien, me fit-elle, ie le crois ainsi; Ie fus tout estonné à cette repartie, mais elle me dit que nostre bon Sauuage Ioseph luy rapportoit par fois ce que nous luy disions, cela me consola fort, car en peu de temps elle fut suffisamment instruicte pour estre baptizée: i'estois seulement en peine de luy faire conceuoir vne douleur de sez pechez, les Sauuages n'ont point en leur langue, si bien en leurs mœurs, ce mot de peché: le mot de meschanceté & de malice signifie parmy eux vne action contre la pureté, à ce qu'ils m'ont dit: i'estois donc en peine de luy faire conceuoir vn deplaisir d'auoir offencé [30] Dieu, ie luy leus par plusieurs fois les Commandemens, luy disant que celuy qui à tout fait haïssoit ceux qui ne luy obeïssoient pas, & qu'elle luy dit qu'elle estoit bien marrie de l'auoir offencé: La pauure femme qui auoit bien retenu les deffences que Dieu a fait à tous les hommes de mentir, de paillarder, de desobeïr à ses parents, s'accusa tout seule