de toutes ses offences par plusieurs fois: disant de soy mesme, celuy qui as tout fait aye pitié de moy, IESVS, Fils de celuy qui peut tout, fais moy misericorde: ie te promets que ie ne m'enyureray plus ny que ie ne diray plus de paroles des honnestes, que ie ne mentiray plus, ie suis marrie de t'auoir fasché, i'en suis marrie de tout mon cœur, ie ne mens point, aye pitié de moy, si je retourne en santé, ie croiray tousiours en toy, ie t'obeiray tousiours, si ie meurs aye pitié de mon ame; l'aiant donc veuë ainsi disposée, craignant d'ailleurs qu'elle ne mourust subitement, car elle estoit fort malade, ie luy demanday si elle ne vouloit pas bien estre baptizée, ie voudrois bien encore viure, me dit-elle, [31] ie cogneu qu'elle s'imaginoit que nous ne donnions point le baptesme qu'à ceux qui deuoient mourir incontinent apres; ie luy fist entendre que nous estions tous baptizés, & que nous n'estions pas morts, que le baptesme rendoit plutost la santé du corps, qu'il ne l'ostoit; baptise moy donc au plutost me fit elle: ie la voulus esprouuer, il estoit arriué quelques canots de Sauuages à Kebec, ie luy dis, voila vne compagnie de tes gens qui vient d'arriuer, si tu veux t'en aller auec eux, ils te receuront, & ie te feray porter en leurs cabanes; la pauure creature se mit à pleurer & à sanglotter si fort, qu'elle me toucha, me tesmoignant par ses larmes qu'elle vouloit estre Chrestienne, & que ie ne la chassasse point: enfin voiant son mal redoubler, nous prismes resolution de la baptizer promptement; ie luy fist entendre qu'elle pourroit mourir la nuict, & que son ame s'en iroit dans les feux, si elle n'estoit baptizée: que si elle vouloit receuoir ce sacrement en nostre Chappelle, que ie l'y ferois apporter dans vne couuerture, elle tesmoigna qu'elle [32] en estoit contente: ie m'en vay, luy disie, preparer tout ce qu'il fault, prends courage, ie t'enuoieray bien-tost querir: la pauure femme n'eut pas la patience d'attendre, elle se traisne comme elle pût, se reposant à tous coups, en fin elle arriua à nostre maison esloignée de plus de deux cent pas de sa cabane, & se jetta par terre n'en pouuant plus, estant reuenuë à soy, ie la baptizay en presence de nos Peres, & de tous nos hommes: elle me respondit brauement à toutes les demandes que ie luy feis, suiuant l'ordre de conferer ce Sacrement aux personnes qui ont l'vsage de raison: Nous la reportasmes dans sa cabane toute pleine de joie, & nous remplis de consolation voiant la grace de Dieu operer dans vne ame où le diable auoit fait sa demeure si long temps. Cecy arriua le premier iour d'Aoust.