[15] Outre cela vne partie de nous estudie fort & ferme à la langue, occupation qui sera vn iour d'autant plus vtile, qu'elle est maintenant épineuse: Nous visitons encor les Sauuages, & par nos begayements nous tâchons de ietter dans leurs ames quelque petit grain de la semence Euangelique, qui fructifiera en son temps s'il plaist à Dieu. Voila nos exercices plus ordinaires, outre les obseruances de la Religion, qui ne se doiuent iamais obmettre. Pour nos François ils s'occupent à se fortifier, à bastir, à défricher, à cultiuer la terre: mais ie ne pretends pas d'écrire tout ce qui se fait en ce pays, ains seulement ce qui tend au bien de la foy, & de la Religion. Cét hyuer passé, la maladie de terre ou de scurbut, s'estant iettée dans la nouuelle habitation des trois Riuieres, où le Pere Buteux [16] & moy estions allez, nous a donné nouuelle occupation meflée de ioye & de tristesse. Nous estions marris d'vn costé, de voir souffrir quasi tous nos pauures François, & d'en voir mourir quelques vns: de l'autre nous nous réiouyssions de voir des effects tout à fait admirables de la grace de nostre Seigneur dedans leurs ames; bon nombre des malades n'ont iamais voulu demander la santé à Dieu, disans ces paroles auec vne grande resignation; Il est nostre Pere, il sçait mieux ce qui nous est bon que non pas nous, laissons le faire, sa saincte volonté soit faite. Ie croy qu'il n'y en a qu'vn seul de ceux qui sont passez en l'autre vie, qui n'aye fait vne confession generale deuant sa mort. Comme i'auois grand desir que l'vn d'eux, pour estre vn ieune homme de fort bonnes mœurs, retournast [17] en santé, ie luy conseillay de faire vn vœu au glorieux Patriarche S. Ioseph, pour impetrer la deliurance de son mal, Ie vous obeyray, me fist-il, mais si vous me laissez en ma liberté, ie prieray seulement le bon S. Ioseph, de m'obtenir de nostre Seigneur la grace d'accomplir sa tres-saincte volonté. Vne autrefois vn ieune garçon fort & robuste se pourmenant dans la chambre des malades, leur demánda ce qu'ils voudroient bien donner pour iouyr d'vne aussi forte santé que la sienne; l'vn d'eux repartit fort sainctement, Ie ne voudrois pas détourner la teste d'vn costé pour iouyr de toute la santé du monde, si bien pour acquiescer au bon plaisir de Dieu. Cette repartie fit veoir combien la grace operoit fortement dans ceste ame. Vn autre qui auoit esté heretique, & d'vne vie assez libertine, estonna [18] tous ses compagnons à la mort: car apres auoir rendu des preuues de sa croyance, apres s'estre reconcilié auec vne grande douleur de ses offenses, comme ie luy presentois le saint Viatique, Ie croy en vous mon Sauueur, disoit-il, ouy ie croy en vous, venez, faites moy misericorde, vous estes assez puissant pour me pardonner tous mes pechez: & se sentant affoiblir il nous pressa sur l'heure mesme de luy donner l'Extreme-Onction, ce que nous fismes; l'ayant receuë auec beaucoup de sentimens de douleur, il apostrophe tous ses Camarades, &