Mon Dieu & mon Sauueur Iesus, quoy que nos pechez nous doiuent esloigner de vostre presence, si est-ce qu'épris d'vne affection de vous honorer & vostre tres-Ste Mere, poussez d'vn desir de nous veoir dans la fidelle correspondance que vous desirez de vos seruiteurs, souhaittãs en [245] outre de vous veoir recõneu & adoré de ces pauures peuples: Nous vous promettons & faisons vœu, comme aussi à la tres-saincte Vierge vostre Mere, & à sõ glorieux Espoux S. Ioseph, de celebrer douze fois és douze mois suiuant le sacrifice de la Ste Messe, pour ceux qui sont Prestres; & pour les autres de reciter douze fois la Couronne ou le Chappellet de la Vierge en l'honneur & en action de grace de son immaculee Cõception, & de ieusner tous la veille de ceste feste: vous promettans en outre que si on erige quelque Eglise ou Chappelle stable dãs ces pais, dans le cours de ce tẽps limité, que nous la ferõs dedier à Dieu sous le tiltre de l'immaculée Cõception, si cela est en nostre pouuoir, le tout pour obtenir de la bõté de N. S. la conuersion de ces Peuples, par l'entremise de sa saincte Mere, & de son sainct Espoux. Receuez [246] cependant, ô l'Emperiere des Anges & des hommes, les cœurs de ces pauures Barbares abandonnez, que nous vous presentons par les mains de vostre glorieux Espoux, & de vos fidelles seruiteurs S. Ignace & S. François Xauier, & de tous les Anges Gardiens de ces miserables contrées, pour les offrir à vostre Fils, afin qu'il leur donne sa cognoissance, & leur applique le merite de son pretieux sang. Ainsi soit-il.