Sur cela les _Arendarhonons_ s'estant eschauffez à nous embarquer, nous trouuasmes place pour six; si bien que nous resolusmes de [117] partir, & laisser les deux petits garçons que nous deuions mener iusqu'à quelque autre occasion: aussi tost nous distribuasmes nos pacquets, & fismes des presens à vn chacun pour les encourager, & le lendemain septiéme du mois, Mr du Plessis Bochard leur en fit encore d'autres, en consideration seulement de ce qu'ils nous embarquoiẽt, & les festoya tous ensemble d'vn festin de trois grandes chaudieres. Mais la contagion qui a couru l'année passée parmy tous ces Peuples, auec de grands rauages, ayant en vn instant saisi plusieurs de nos Sauuages, & remply tout le reste de peur, nous causa derechef vne grande confusion, & nous mit en de grandes peines, veu qu'il falloit partir sur le champ. Nos six canots estans reduits à trois, & nos deux Peres & moy nous trouuans desembarquez; [118] il me falloit chercher de nouueaux hommes; reprendre nostre petit equipage; deliberer qui s'embarqueroit, & qui demeureroit; choisir entre nos pacquets ceux que nous porterions, & donner ordre pour le reste, & tout cela en moins de demye-heure, où il eust esté besoin des iournées entieres. Neantmoins recognoissans bien que nostre embarquement estoit vn coup de partie pour le Ciel, nous pensasmes qu'il falloit y faire tous nos efforts, pour resister à ceux de l'ennemy commun du salut des hommes, que nous ne doutions nullement s'estre meslé dans cét affaire. I'y fis tout mõ pouuoir, nous redoublasmes les presens, nous diminuasmes nostre petit bagage, & prismes seulement ce qui concernoit le sainct Sacrifice de la Messe, & ce qui estoit absolument necessaire pour la vie. Monsieur [119] du Plessis y interposa son authorité, Monsieur Oliuer & Monsieur Coullart leur industrie, & tous les François leur affection. Cependant ie vis par plusieurs fois tout renuersé & desesperé, iusqu'à ce que i'eus particulierement recours à nostre Seigneur +IESVS+, pour l'vnique gloire duquel nous entreprenions ce penible voyage, & que i'eus fait vn vœu au glorieux sainct Ioseph nouueau Patriarche des Hurons. Car aussi-tost ie vis tout se calmer, & nos Sauuages si contens, que ceux qui embarquerent le Pere Daniel l'auoient desia mis dans leur canot, & sembloit qu'ils l'alloiẽt emmener, sans auoir encore receu la paye ordinaire. Mais ledit Pere voyant qu'ils n'auoient point de capots comme les autres, sort du canot, m'en aduertit, & ie leur en fais donner.