En fin donc apres auoir briéuement [120] remercié Mr du Plessis, luy auoir recommandé l'embarquement du reste de nos gens, si l'occasion se presentoit, & luy auoir dit adieu, & à tous nos François: Ie m'embarquay auec le Pere Antoine Daniel, & vn de nos hommes; les deux autres venoient auec les Algonquains. Monsieur du Plessis honora nostre depart de plusieurs canonnades, afin de nous rendre encore plus recommandables à nos Sauuages. Ce fut le septiesme Iuillet. Le P. Ambroise Dauost s'embarqua huict iours apres auec deux autres de nos gens. Le reste suiuit huict iours apres, pour prendre sa part des fatigues d'vn voyage tres fascheux, non seulement à raison de sa longueur, & de la mauuaise chere qu'on y fait, mais encore pour les circuits qu'il faut faire de Kebec iusques icy par les Bissiriniens & la petite Nation; ie [121] croy qu'il y en a pour plus de trois cens lieuës. Il est vray que le chemin est plus court par le Saut de S. Louys, & par le Lac des Hiroquois, mais la crainte des ennemis, & le peu de commodité qui s'y rencontre, en rẽd le passage desert. De deux difficultez ordinaires, la premiere est celle des sauts & portages. Vostre Reuerence a desia assez veu de sauts d'eau vers Kebec, pour sçauoir ce qui en est: toutes les riuieres de ces Pays en sont pleines, & notamment la riuiere de S. Laurens, depuis qu'on a passé celle des Prairies. Car de là en auant elle n'a plus son lit égal, mais se brise en plusieurs endroits, roulant & sautant effroyablement, à guise d'vn torrent impetueux, & mesmes en quelques endroits elle tombe tout à coup de haut en bas, de la hauteur de plusieurs brasses. Ie me souuenois [122] en passant des Catadoupes du Nil, à ce qu'en disent nos Historiens. Or quand on approche de ces cheutes ou torrens, il faut mettre pied à terre, & porter au col à trauers les bois, ou sur de hautes & facheuses roches, tous les pacquets & les canots mesmes. Cela ne se fait pas sans beaucoup de trauail, car il y a des portages d'vne, de deux & de trois lieuës, ioint qu'il faut en chacun faire plusieurs voyages, si on a tãt soit peu de pacquets. En quelques endroits, qui ne sont pas moins rapides que ces portages; mais neantmoins plus aisez à l'abord, les Sauuages entrans dans l'eau, trainent & conduisent à la main leurs canots, auec d'extremes peines & dangers; car ils en ont par fois iusques au col, si bien qu'ils sont contraints de quitter prise, & se sauuer comme ils peuuent de la rapidité de l'eau, qui emporte & [123] leur arrache le canot. Cela est arriué à vn de nos François, qui demeura seul dans le canot, tous les Sauuages l'ayans laissé aller au gré du torrent mais son adresse & sa force luy sauuerent la vie, & le canot aussi, auec tout ce qui estoit dedans. I'ay supputé le nombre des portages, & ie trouue que nous auons porté trente cinq fois, & traisné pour le moins cinquante. Ie me suis quelquefois meslé d'aider à mes Sa[u]uages: mais le fond de la riuiere est de pierres si tranchantes,