Le 26. du mesme mois ie baptisay Marie _Oquiaendis_ mere du Capitaine de ce village, ayeule de l'autre Marie. Celle-cy vit encore, & attribuë sa guerisõ à la vertu du S. Baptesme, le publiant par tout. En effet elle estoit quasi aux abois, & dés qu'elle fut lauée de ces sacrées eaux, elle commença à se mieux porter. Le 20. d'Octobre, ie partis pour aller à la Nation du Petun: en ce voyage Dieu me fit la faueur de baptifer & enuoyer au Ciel trois petits enfans, l'vn desquels entre autres alloit ietter les derniers souspirs quãd i'arriuay dãs sa cabane, où à peine eus-je le loisir [185] de l'ondoyer. Au retour du voyage, ie trouuay que le P. Daniel auoit baptisé Ioseph _Ioutaya_, qu'on croyoit deuoir expirer sur le chãp. Ie l'auois instruit auparauãt. Il a suruécu long temps, tousiours languissant, & faisant beaucoup d'actes de vertu. Nous l'auons assisté corporellement & spirituellement; si bien que luy & toute sa cabane n'attribuoient la prolongatiõ de sa vie, qu'au double secours qu'il a receu de nostre part. En fin estant mort heureusement dãs la cõfession & inuocatiõ du vray Dieu, & dans la repentãce de ses pechez, nous l'enterrasmes solẽnellement comme il l'auoit desiré. Nous auõs admiré le soin, la charité & la perseuerãce de sa fẽme, dãs les deuoirs & seruices qu'elle luy rẽdoit pendãt vne fort longue, fort salle, & fort puãte maladie. Elle & toute sa cabane (où nous en auons déja baptisé trois) nous est demeurée [186] fort affectionnée, & ils m'ont protesté plusieurs fois qu'ils seroient tous à la vie, à la mort, & au delà en nostre disposition. Mais nous ne les iugeons pas encore assez instruits. C'est en ceste cabane où demeure le premier Huron que i'aye iamais baptizé qui fut l'an mil six cens vingt-neuf, auant nostre depart de ce Pays. C'estoit vn petit enfant tenu pour mort, lequel sembla renaistre & reuiure doublement dans les eaux viuifiantes du sainct Baptesme. Il vit encore aagé d'enuiron cinq ans, & est fort gentil.