“Jeo ke suy ensele de suz, reconnuse verreye reconusaunce et testimoine pur mon pere Hagyn le fiz mestre Moss, ke Sire Johan de Say et ses auncestres et ses Heyres quites sunt de mun Pere avaunt dit, et de ses heyrs, et de tuz ses enfaunz, et de moy, et de mes heirs, et de mes assignes, de totes dettes, demaundes, chalendes, et plegages, ke eus a nus esteint tenuz, par Chartre u par nule Cirographe, u autre estrument; fetes avaunt ke cest Estar, del commencement du Secle dek a la fyn. Et si seit trove Chartre, u taille, u autre estrument, sur le nun le avaunt dit Sire Johan, u akeun de ces auncestres, u akeun de ses heires, e en le nun mun pere avaunt dit, u akeun de ses heires, u akeun de sez enfaunz, u en mun nun, u akeun di mes auncestres, u de mes heires, en la Huche nostre Seynur le Rey, u de hors, fetes avaunt ke cest Estar fu feyt; Je reconus et tesmoyne pur mun pere avaunt dit, et pur tuz ses heirs, et pur ses enfaunz, et pur moy, et pur mes heires, et pur mes enfaunz et assignes, ke quites seent a tuz jurz, et ren ne vaylet. E Jo et mes heires warrantirum aquiterum et defenderum le avaunt dit Sire Johan de Say, et ses heires, enver mun pere avaunt dit, et envers tuz ses heires, et ses assignes de tuttes dettes ke la avaunt dit Sire Johan a eus esteynt tenuz avaunt cest Estar fu fet, du comencement du secle dek a la fin. Act le Venderdi prochein apres la Seinte Lucy, lan du Regne le Re Edeward le fiz le Rey Henry, secund. E ceo ke jeo ay reconu, ai ensele cum aturne mun pere avaunt dit en ceste chose. “JACOB LE FIZ HAGIN.” G.