‘Apres ceo vient Adelwold son fitz q~ reigna XVJ et demie, si engendroit ij feiz et iij filis, dount trestoutz murrirent frechement fors q~ sa pune file, le out a nom _Goldburgh_, del age de VJ aunz kaunt son pere Adelwold morust. Cely Roy Adelwold quant il doit morir, comaunda sa file a garder a vn Count de Cornewayle, al houre kaunt il quidou~ie (sic) hountousment auoir deparagé, quaunt fit _Haueloke_, fitz le Roy Byrkenbayne de Denmarche, esposer le, encountre sa volunté, q~ primis fuit Roy Dengleterre et de Denmarch tout a vn foitz, par quele aliaunce leis Daneis queillerunt g^{e}ndr~ (sic) mestrie en Engleterre, et long temps puise le tindrunt, _si cum vous nouncie l’estorie de Grimesby_, come _Grime_ primez nurist Haueloke en Engleterre, depuis cel houre q’il feut chasé de Denmarche &c. deqis al houre q’il vint au chastelle de Nichole, q~ cely auauntdit traitre _Goudriche_ out en garde, en quel chastel il auauntdit Haueloke espousa l’auauntdit Goldeburgh, q~ fuit heir Dengleterre. Et par cel reson tynt cely Haueloke la terre de Denmarche auxi comme son heritage, et Engleterre auxi par mariage de sa femme; et si entendrez vous, q~ par la reson q~ ly auauntdit Gryme ariua primez, kaunt il amena l’enfaunt Haueloke hors de Denmarche, par meyme la reson reseut cele vile son nom, de Grime, quel noun ly tint vnquore Grimisby. ‘Apres ceo regna meyme cely Haueloke, q~ mult fuit prodhomme, et droiturelle, et bien demenoit son people en reson et ley. Cel Roy Haueloke reigna xlj. aunz, si engendroit ix fitz et vij filis, dount trestoutz murrerount ainz q~ furunt d’age, fors soulement iiij de ses feitz, dont l’un out a noum Gurmound, cely q~ entendy auoir son heire en Engleterre; le secound out a noun Knout, quen fitz feffoit son pere en le regne de Denmarche, quant il estoit del age de xviij aunz, et ly mesme se tynt a la coroune Dengleterre, quel terre il entendy al oeps son ainez fitz Gurmound auoir gardé. Mes il debusa son col auxi comme il feu mounté vn cheval testous q~ poindre volleyt, en l’an de son regne xxiij entrant. Le tiers fitz ont a noun Godard, q~ son pere feffoit de la Seneschacie Dengleterre, q~ n’auo~ut (sic) taunt come ore fait ly quart. Et le puisnez fitz de toutz out a noum Thorand, q~ espousa la Countesse de Hertouwe en Norwey. Et par la reson q~ cely Thorand feut enherité en la terre de Norwey, ly et ses successours sont enheritez iekis en sa p~ce (sic) toutdis, puis y auoit affinité de alliaunce entre ceulx de Denmarche et ceulx de Norwey, a checun venue q~ vnkes firent en ceste terre pur chalenge ou clayme mettre, iekis a taunt q~ lour accion feut enseyne destrut par vn noble chevallere _Guy de Warwike_, &c. Et tout en sy feffoit Haueloke sez quatre fitz: si gist a priorie de _Grescherche_ en Loundrez.’ --f. 6 b.