Sone then deyde Egelbright, & his wyf Orewayn, & therfore was kyng Edelsye, bothe joyful & fayn. Anon their doughter & here Eyr, his nece dame Argill, & al the kyngdam he tok in hande, al at his owene will. Ther serued Hauelok as quistron, & was y-cald Coraunt, He was ful mykel & hardy, & strong as a Geaunt. He was bold Curteys & fre, & fair & god of manere, So th^t alle folk hym louede, th^t auewest hym were. But for couetise of desheraison, of damysele Argill, & for a chere th^t the kyng sey, scheo made Coraunt till, He dide hem arraye ful symplely, & wedde togydere bothe, For he ne rewarded desparagyng, were manion ful wrothe. A while they dwelt after in court, in ful pore degre, The schame & sorewe th^t Argill hadde, hit was a deol to se. Then seyde scheo til hure maister, of whenne sire be ȝe? Haue ȝe no kyn ne frendes at hom, in ȝoure contre? Leuer were me lyue in pore lyf, wythoute schame & tene, Than in schame & sorewe, lede the astat of quene. Thenne wente they forth to Grymesby, al by his wyues red, & founde th^t Grym & his wyf, weren bothe ded. But he fond ther on Aunger, Grymes cosyn hend, To wham th^t Grym & his wyf, had teld word & ende. How th^t hit stod wyth Hauelok, in all manere degre, & they hit hym telde & conseilled, to drawe til his contre, Tasaye what grace he mighte fynde, among his frendes there, & they wolde ordeyne for their schipynge, and al th^t hem nede were. When Aunger hadde y-schiped hem, they seilled forth ful swythe, Ful-but in til Denemark, wyth weder fair & lithe. Ther fond he on sire Sykar, a man of gret pousté, Th^t hey styward somtyme was, of al his fader fe. Ful fayn was he of his comyng, & god help him behight, To recouere his heritage, of Edulf kyng & knyght. Sone asembled they gret folk, of his sibmen & frendes, Kyng Edulf gadered his power, & ageyn them wendes. Desconfyt was ther kyng Edulf, & al his grete bataill, & so conquered Hauelok, his heritage saunz faille. Sone after he schop him gret power, in toward Ingelond, His wyues heritage to wynne, ne wolde he nought wonde. Th^t herde the kyng of Lyndeseye, he was come on th^t cost, & schop to fighte wyth hym sone, & gadered hym gret host. But atte day of bataill, Edelsy was desconfit, & after by tretys gaf Argentill, hure heritage al quit. & for scheo was next of his blod, Hauelokes wyf so feyr, He gaf hure Lyndesey after his day, & made hure his Eyr. & atte last so byfel, th^t vnder Hauelokes schelde, Al Northfolk & Lyndeseye, holy of hym they helde.’ MS. Lamb. 131. leaf 76. [Footnote 11: The writing in the earlier portion (concerning Havelok) is hardly later than A.D. 1400.]