Quiston un chicouloun de rèn; pièi de ti resto Soun plus countènt, ausson la testo E volon tout. L’auran. Sis arpioun en rastèu Te gatihoun lou bout de l’alo. Sus ta larjo esquinasso es un mounto-davalo; T’aganton pèr lou bè, li bano, lis artèu; Tiron d’eici, d’eilà. L’impaciènci te gagno. Pst! pst! d’un giscle de pissagno Aspèrges l’assemblado e quites lou ramèu. T’en vas bèn liuen de la racaio, Que t’a rauba lou pous, e ris, e se gougaio, E se lipo li brego enviscado de mèu. Or d’aqueli boumian abèura sens fatigo, Lou mai tihous es la fournigo. Mousco, cabrian, guespo e tavan embana, Espeloufi de touto meno, Costo-en-long qu’à toun pous lou souleias ameno, N’an pas soun testardige à te faire enana. Pèr t’esquicha l’artèu, te coutiga lou mourre, Te pessuga lou nas, pèr courre A l’oumbro de toun ventre, osco! degun la vau. Lou marrit-péu prend pèr escalo Uno patto e te monto, ardido, sus lis alo, E s’espasso, insoulènto, e vai d’amont, d’avau. II Aro veici qu’es pas de crèire. Ancian tèms, nous dison li rèire, Un jour d’ivèr, la fam te prenguè. Lou front bas E d’escoundoun anères vèire, Dins si grand magasin, la fournigo, eilàbas. L’endrudido au soulèu secavo, Avans de lis escoundre en cavo, Si blad qu’aviè mousi l’eigagno de la niue. Quand èron lest lis ensacavo. Tu survènes alor, emè de plour is iue. Ié disés: “Fai bèn fre; l’aurasso D’un caire à l’autre me tirasso Avanido de fam. A toun riche mouloun Leisso-me prène pèr ma biasso. Te lou rendrai segur au bèu tèms di meloun. “Presto-me un pau de gran.” Mai, bouto, Se cresès que l’autro, t’escouto, T’enganes. Di gros sa, rèn de rèn sara tièu. “Vai-t’en plus liuen rascia de bouto; Crebo de fam l’iver, tu que cantes l’estièu” Ansin charro la fablo antico Pèr nous counséia la pratico Di sarro-piastro, urous de nousa li courdoun De si bourso.—Que la coulico Rousiguè la tripaio en aqueli coudoun! Me fai susa, lou fabulisto, Quand dis que l’ivèr vas en quisto De mousco, verme, gran, tu que manges jamai. De blad! Que n’en fariès, ma fisto! As ta fon melicouso e demandes rèn mai. Que t’enchau l’ivèr! Ta famiho A la sousto en terro soumiho, E tu dormes la som que n’a ges de revèi; Toun cadabre toumbo en douliho. Un jour, en tafurant, la fournigo lou vèi.