"Then what did Carlaverock Jock do but set his heid to a yett [gate] and ding it in flinders; fair fire-wood he made o't; an' sae, rampagin' into the meadow across whilk," continued the old lady, with a rising delight in her eye, "the three cavalry men were comin' to see me, wi' the spurs on them jangling clear. Reed breeks did na suit Jock's taste at the best o' times, and he had no been brocht up to countenance yellow facin's. So the three braw King George's sodgers that had dune sic graund things at Waterloo took the quickest road through the meadow. Captain St. Clair, he trippit on his sword, an' was understood to cry oot that he had never eaten beef in his life. Ensign Withershins threw his shako ower his shoother and jumpit intil the water, whaur he expressed his opinion o' Carlaverock Jock stan'in' up to his neck in Luckie Mowatt's pool--the words I dinna juist call to mind at this present time, which, indeed, is maybe as weel; but it was Lieutenant Lichtbody, o' his Majesty's Heavy Dragoons, that cam' aff at the waurst. He made for the stane dyke, the sven-fite march dyke that rins up the hill, ye ken. Weel, he made as if he wad mak' ower it, but Boreland'a big Heelant bull had heard the routin' o' his friend Carlaverock Jock, an' was there wi' his horns spread like a man keppin' yowes [catching sheep]. Aye, my certes!" here the old lady paused, overcome by the humour of her recollections, laughing in her glee a delightfully catching and mellow laugh, in which Winsome joined. "Sae there was my braw beau, Lieutenant Lichtbody, sittin' on his hunkers on the dyke tap girnin' at Carlaverock Jock an' the Boreland Hielantman on baith sides o' him, an' tryin' tae hit them ower the nose wi' the scabbard o' his sword, for the whinger itsel' had drappit oot in what ye micht ca' the forced retreat. It was bonny, bonny to see; an' whan the three cam' up the loanin' the neist day, 'Sirs,' I said, 'I'm thinkin' ye had better be gaun. I saw Carlaverock Jock the noo, fair tearin' up the greensward. It wudna be bonny gin his Majesty's officers had twice to mak' sae rapid a march to the rear--an' you, Lieutenant Lichtbody, canna hae a'thegither gotten the better o' yer lang sederunt on the tap o' the hill dyke. It's a bonny view that ye had. It was a peety that ye had forgotten yer perspective glasses.' "And wad ye believe it, lassie, the threesome turned on the braid o'their fit an' marched doon the road withoot as muckle as Fair- guid-e'en or Fair-guid-day!" "And what said ye, grannie dear?" said Winsome, who sat on a low seat looking up at her granny. "O lassie, I juist set my braid hat ower my lug wi' the bonny white cockade intil't an' gied them 'The Wee, Wee German Lairdie' as they gaed doon the road, an' syne on the back o't: "'Awa, Whigs, awa'! Ye're but a pack----'"