"As muckle as atween auld Peter Spens and his wife, wha was saxteen when he was saxty, and she was playing at dumps in the street when her man was waiting for her to make his porridge. Ay, sic a differ doesna suit wi' common folk, but of course earls can please themsels. Rintoul's so fond o' the leddyship 'at is to be, that when she was at the school in Edinbury he wrote to her ilka day. Kaytherine Crummie telled me that, and she says aince you're used to it, writing letters is as easy as skinning moles. I dinna ken what they can write sic a heap about, but I daur say he gies her his views on the Chartist agitation and the potato disease, and she'll write back about the romantic sichts o' Edinbury and the sermons o' the grand preachers she hears. Sal, though, thae grand folk has no religion to speak o', for they're a' English kirk. You're no' speiring what her leddyship said to me?" "What did she say?" "Weel, you see, there was a dancing ball on, and Kaytherine Crummie took me to a window whaur I could stand on a flower-pot and watch the critturs whirling round in the ball like teetotums. What's mair, she pointed out the leddyship that's to be to me, and I just glowered at her, for thinks I, 'Take your fill, Sanders, and whaur there's lords and leddyships, dinna waste a minute on colonels and honourable misses and sic like dirt.' Ay, but what wi' my een blinking at the blaze o' candles, I lost sicht o' her till all at aince somebody says at my lug, 'Well, my man, and who is the prettiest lady in the room?' Mr. Dishart, it was her leddyship. She looked like a star." "And what did you do?" "The first thing I did was to fall aff the flower-pot; but syne I came to, and says I, wi' a polite smirk, 'I'm thinking your leddyship,' says I, 'as you're the bonniest yourself.'" "I see you are a cute man, Sanders." "Ay, but that's no' a'. She lauched in a pleased way and tapped me wi' her fan, and says she, 'Why do you think me the prettiest?' I dinna deny but what that staggered me, but I thocht a minute, and took a look at the other dancers again, and syne I says, michty sly like, 'The other leddies,' I says, 'has sic sma' feet.'" Sanders stopped here and looked doubtingly at Gavin. "I canna make up my mind," he said, "whether she liked that, for she rapped my knuckles wi' her fan fell sair, and aff she gaed. Ay, I consulted Tammas Haggart about it, and he says, 'The flirty crittur,' he says. What would you say, Mr. Dishart?"