"I held her to my beating heart, My young, my smiling lammie! 'I hae a house, it cost me dear; I 've wealth o' plenishin' and gear;-- Ye 'se get it a', were 't ten times mair, Gin ye will leave your mammy.' "The smile gaed aff her bonnie face-- 'I maunna leave my mammy; She 's gi'en me meat, she 's gi'en me claise, She 's been my comfort a' my days; My father's death brought mony waes-- I canna leave my mammy.'" "We 'll tak her hame, and mak her fain, My ain kind-hearted lammie; We 'll gi'e her meat, we 'll gi'e her claise, We 'll be her comfort a' her days." The wee thing gi'es her hand and says-- "There! gang and ask my mammy." "Has she been to kirk wi' thee, My boy, Tammy?" "She has been to kirk wi' me, And the tear was in her e'e; But, oh! she 's but a young thing, Just come frae her mammy." [13] This beautiful ballad was first printed, in 1791, in _The Bee_. It is adapted to an old and sweet air, to which, however, very puerile words were attached. OH, TELL ME HOW FOR TO WOO![14] TUNE--_"Bonnie Dundee."_ "Oh, tell me, bonnie young lassie! Oh, tell me how for to woo! Oh, tell me, bonnie sweet lassie! Oh, tell me how for to woo! Say, maun I roose your cheeks like the morning? Lips, like the roses, fresh moisten'd wi' dew; Say, maun I roose your een's pawkie scorning? Oh, tell me how for to woo! "Far hae I wander'd to see thee, dear lassie! Far hae I ventured across the saut sea; Far hae I travell'd ower moorland and mountain, Houseless and weary, sleep'd cauld on the lea. Ne'er hae I tried yet to mak love to onie, For ne'er lo'ed I onie till ance I lo'ed you; Now we 're alane in the green-wood sae bonnie-- Oh, tell me how for to woo!" "What care I for your wand'ring, young laddie? What care I for your crossing the sea? It was na for naething ye left poor young Peggie; It was for my tocher ye cam' to court me. Say, hae ye gowd to busk me aye gaudie? Ribbons, and perlins, and breast-knots enew? A house that is canty, with wealth in 't, my laddie? Without this ye never need try for to woo." "I hae na gowd to busk ye aye gaudie; I canna buy ribbons and perlins enew; I 've naething to brag o' house, or o' plenty, I 've little to gi'e, but a heart that is true. I cam' na for tocher--I ne'er heard o' onie; I never lo'ed Peggy, nor e'er brak my vow: I 've wander'd, puir fule! for a face fause as bonnie: I little thocht this was the way for to woo."