Smiling, twice ye made me troo, Twice, poor fool! I turn'd to woo; Twice, fause maid! ye brak your vow; Now I 've sworn to leave ye. Twice, fause maid! ye brak your vow; Twice, poor fool! I 've learn'd to rue; Come ye yet to mak me troo? Thrice ye 'll ne'er deceive me. No, no! Mary Bawn, Mary Bawn, Mary Bawn; Oh, no! Mary Bawn; thrice ye 'll ne'er deceive me. Mary saw him turn to part; Deep his words sank in her heart; Soon the tears began to start-- "Johnnie, will ye leave me?" Soon the tears began to start, Grit and gritter grew his heart; "Yet a word before we part, Love could ne'er deceive ye. Oh, no! Johnnie doo, Johnnie doo, Johnnie doo; Oh, no! Johnnie doo--love could ne'er deceive ye." Johnnie took a parting keek; Saw the tears drap owre her cheek; Pale she stood, but couldna speak-- Mary 's cured o' smiling. Johnnie took anither keek-- Beauty's rose has left her cheek; Pale she stands, and canna speak. This is nae beguiling. Oh, no! Mary Bawn, Mary Bawn, dear Mary Bawn; Oh, no; Mary Bawn--love has nae beguiling. COME UNDER MY PLAIDIE. TUNE--_"Johnnie M'Gill."_ "Come under my plaidie, the night 's gaun to fa'; Come in frae the cauld blast, the drift, and the snaw; Come under my plaidie, and sit down beside me, There 's room in 't, dear lassie, believe me, for twa. Come under my plaidie, and sit down beside me, I 'll hap ye frae every cauld blast that can blaw: Oh, come under my plaidie, and sit down beside me! There 's room in 't, dear lassie, believe me, for twa." "Gae 'wa wi' your plaidie, auld Donald, gae 'wa, I fear na the cauld blast, the drift, nor the snaw; Gae 'wa wi' your plaidie, I 'll no sit beside ye; Ye may be my gutcher;--auld Donald, gae 'wa. I 'm gaun to meet Johnnie, he 's young and he 's bonnie; He 's been at Meg's bridal, fu' trig and fu' braw; Oh, nane dances sae lightly, sae gracefu', sae tightly! His cheek 's like the new rose, his brow 's like the snaw." "Dear Marion, let that flee stick fast to the wa'; Your Jock 's but a gowk, and has naething ava; The hale o' his pack he has now on his back-- He 's thretty, and I am but threescore and twa. Be frank now and kindly; I 'll busk ye aye finely; To kirk or to market they 'll few gang sae braw; A bein house to bide in, a chaise for to ride in, And flunkies to 'tend ye as aft as ye ca'."