To all maner men that this present wrytyng comyth to, John Treffry efte Tremur, Thomas Brown, John Coche, and John Wythiell gretyng, Where diverse discencion, discordis and debatis weryn bytwene Alan priour of the priory of Bodmyn and his convent ther in the one party, and Richard Flamank esquier, in that other party, of and yn certeyn landys and tenementis with the appertenaunce in Litell Boscarn and Dynmur, of which landis and tenementis in Litell Boscarn there assise of novel disseisin hangith, and a writte of oyer and terminer of trespas supposed there afore John Hale and Richard Neweton, Justis of assise in the counte of Comwaill, assigned at the suyte of the said Richard agenst the saide priour and other. To whiche the saide Richard and the saide priour have putte ham yn arbitrement, ordinaunce, and juggement of ous forsaide Thomas and John Wythiell arbitrours in the party of the saide Richard chosen, and of ous forsaide John Tremur and John Coche arbitrours in the party of the saide priour chosen, to whiche arbitriment, ordinance, and juggement to stande and perfourme for the party of the saide Richard, Jamys Flamank ys bonden by his obligacion berynge date the Tywysday nexte after the Conversion of Seynt Paule the yeer of reigne of Kyng Harry the Sexte twolthe, to the saide priour in cc. pound. And the forsaide priour ys bounden by his obligacion beryng date the same day and yeere to the saide Jamys yn cc. pound to stande and perfourme in his party the saide arbitriment, ordinaunce, and juggement as yn the same obligacions more pleynly ys conteyned. Be hit to knowe to alle manner men by this present our endentours, that we arbitrours forsaide arbitre, ordeyne, and ajugge in the fourme as ensueth, that ys to wete, that the bounde that comyth thurgh the doune lyinge bytween the lande of the saide priour and the saide Richard, comynge to a stone standynge with oute a diche by Dynmur wode yclepyd Kenediche in the north side of the said diche ther of old tyme beynge abounde, ys and schall be a bounde bytwene the saide priour and his successors and the saide Richard and his heyres; and so goyng don to another stone standyng of olde tyme in a banke of a grype; and fro that stone into another stone beyng of olde tyme a bounde; and fro that stone to another stone by an oke, by ous new pighte, and so the saide diche and the grype beyng several to the saide Richard and to his heires, and so fro the ende of that grype righte to the north west corner of Dynmur brigge by a bounde that we have set, is and schall be the bounde bytwene the saide priour and his successours, and the saide Richard and his heyres. And the saide Rychard and his heyres schal have al the landys withynne the same diche and boundys; and the saide Priour and his successours schal have al the land, wode, and the mill called Dynmur mille, beynge with oute the saide diche, gripe, and boundis, and also the saide Richard and