his heyres schall have alle the land bynethe the said brigge; and that the saide priour and his successours schall have fre outefluvie and curse of water fro the saide mille into the water of Alan, in the manner as it rennith nowe; and also the saide priour and his successours schall have fre goynge and comynge for him and for his servaunts to purge and clense alle the saide curse of water, and to caste the stonys and gravell, fenne and slyme, of the same lete, in bothe sidys uppon the lande of the same Richard, there to abide and not to cast ne hele the motys ne the kutte of the treys ther growynge, and yf eny treys wyxen uppon the sides of the same water, in letting other noysaunce of the curse or purgynge of the same water, thenne that the saide priour may do warne the saide Richard and his heyres to kutte and remove al suche treys, And but yf he so do with ynne sevene dayes after suche warnynge, that then it schal be lufful and lawfull to the saide priour and his successours and his servauntes to kutte and remove alle suche treys and leve on the grounde of the saide Richard. And also the saide priour, and his convent schal grante under har comune seal to the saide Jamys for his costages and for to be good frende to the saide priour and his successours havynge an annuyte of syxantwenty schelyng an eghte pans to be take yeerly, terme of his lyf, by the handys of the styward of the saide priour of the saide hous, who that ever be priour, at the festis of Nativite of Seynt John Baptiste and Cristismasse by evene portions, And if it be by hynde by a moneth after every terme forsaide, if it be asket by the saide Jamys other his servauntes that thenne it be lawfull to the forsaide Jamys in al the lands of Wythiellgoos to distreyne; and that distrece so take to imparke and inpounde it unto the tyme of the forsaide syxantwenty schelynge and eghte pans satisfaccion be ymade togeder with the arrerag, And also the forsaide priour and his successours schal holde perpetually onys a yeer, that ys to wetynge at Seynt Vincent ys day the obyt of Richard Flamank, Margaret his wyf, Jamys Flamank, and Elizabeth his wyff, and Anne the daughter of the saide Richard, and for all har good doerys, And also the forsaide Richard and Jamys Flamank and her heires schal leve al maner of suytes the whiche they have other maye have agenst the saide priour and convent and alle other men as twochinge the materys and causes forsaide, And also the saide priour and his successours schal leve al maner of suytes the whiche they haue other mowe haue against the forsaide Richard and Jamys Flamank, and all other men as twochynge the materys and causes forsaide. To whiche arbitriment, ordinaunce, and juggement, we foure arbitratours forsaide, to this our present endentours our seales haue y put her to wytnys. Thomas Moyle maior of the burgh of Bodmyn, John Corke, Thomas Bere of Bryn, John Nicoll, Walter Pole, John Peyntor, Thomas Daunant, and other. I wryte at Bodmyn awendysday