Aye. A dare say it’s cauld anough, bit the weather can wait. A’ve got somethin’ else tae talk tae ye aboot besides the weather. MARY Mebbe ye huv, ma boy, but ye’ll huv tae wait till the richt time comes. JOCK Mary, lassie, will A huv tae wait till the nicht fur ma answer? MARY Play fair noo, Jock. Ye gien me a day frae last nicht tae think aboot it. JOCK A ken A did. That’s richt anough. Only it’s no’ sae easy tae wait as A thocht it wis when it comes tae daein’t. MARY Mebbe no’. But ye’ll jist huv tae pit up wi’t. It wis you that said wait. A never mentioned it. JOCK Ye shouldnae be sae hard on a chap, Mary. A’m wantin’ ye that bad. A’m on needles and peens till A ken whit road the cat’ll jump. Ye never ken, Mary, what’ll happen doon a pit. Jist think. A micht never come up again and ye’d be sick and sorry if A wis blown tae kingdom come an’ no’ huv the consolation o’ kennin’ that ye meant tae huv me. MARY It’s nae use, ma boy. Ye’ll no’ frichten me that wey. A’m no’ pit born like you, but A’ve stayed aside pits a bit ower lang fur that. An’ ye ken weel anough it’s no’ richt tae talk aboot they things. A tell’t ye A’d gie ye yer answer the nicht an’ ye’ll huv tae wait till the nicht fur it. A’m no’ gaun back on ma word. JOCK Bit if ye ken whit ye’re gaun tae say whit wey wull ye no’ say it noo and pit me oot o’ misery? MARY Aye, an’ huv ye gaun aboot tellin’ everybody that aw ye hud tae dae wis whistle an’ A rushed intae yer airms. Naw, ma boy, A’m a single wumman yit and A’m no promised tae nae man. A’ll tak’ ma ain time tae tell ye whether A’m gaun tae chinge ma name or no’. (Breaking off and looking at the clock.) It’s time ye were flittin’. Ye’ll be late if ye don’t hurry up. JOCK A don’t care if A am. MARY Aw, but ye dae. Don’t be a silly. Ye ken ye’ve never missed bein’ in the first cage doon since ye startet workin’ an’ A ‘ll no’ hae folk saying ye startet missin’ it ower me. Hae ye finished yer cocoa? JOCK Aye. Ye’re terrible hard on a chap, Mary. MARY Awa’ wi ye. If ye hud a’ been as keen on mairryin’ me as ye think ye are, ye wud mebbe huv plucked up courage tae ask me shuner. JOCK