gode beleeve, scholde overcomen and out chacen a 1000 cursed mysbeleevynge men: as David seyth in the Psautere, _Quoniam persequebatur unus mille, et duo fugarent decem milia_. Et, _Cadent a latere tuo mille, et decem milia a dextris tuis_. And how that it myghte ben, that on scholde chacen a 1000, David himself seythe, folewynge, _Quia manus Domini fecit hæc omnia_. And oure Lord himself seythe, be the prophetes mouth, _Si in viis meis ambulaveritis, super tribulantes vos misissem manum meam_. So that wee may seen apertely, that zif wee wil be gode men, non enemye ne may not enduren azenst us. Also zee schulle undirstonde, that out of that lond of derknesse, gothe out a gret ryvere, that schewethe wel, that there ben folk dwellynge, be many redy tokenes: but no man dar not entre in to it. And wytethe well, that in the kyngdoms of Georgie, of Abchaz and of the litile Armenye, ben gode Cristene men and devoute. For thei schryven hem and howsele hem evermore ones or twyes in the woke. And there ben many of hem, that howsele hem every day: and so do wee not on this half; alle be it that Seynt Poul commandethe it, seyenge, _Omnibus diebus dominicis ad communicandum hortor_. Thei kepen that commandement: but wee ne kepen it not. Also aftre, on this half, is Turkye, that marchethe to the gret Armenye. And there ben many provynces, as Capadoche, Saure, Brique, Quesiton, Pytan and Gemethe. And in everyche of theise ben many gode cytees. This Turkye strecchethe unto the cytee of Sachala, that sittethe upon the see of Grece; and so it marchethe to Syrie. Syrie is a gret contree and a gode, as I have told zou before. And also it hathe, aboven toward Ynde, the kyngdom of Caldee, that strecchethe fro the mountaynes of Calde, toward the est, unto the cytee of Nynyvee, that sittethe upon the ryvere of Tygre: and in largenesse, it begynnethe toward the northe, to the cytee of Maraga; and it strecchethe toward the southe, unto the see occean. In Caldee is a pleyn contree, and fewe hilles and few ryveres. Aftre is the kyngdom of Mesopotayme, that begynnethe toward the est, to the flom of Tygre, unto a cytee that is clept Moselle: and it strecchethe toward the west, to the flom of Eufrate, unto a cytee that is clept Roianz: and in lengthe it gothe to the mount of Armenye, unto the desert of Ynde the lesse. This is a gode contree and a pleyn; but it hathe fewe ryveres. It hathe but 2 mountaynes in that contree: of the whiche, on highte Symar, and that other Lyson. And this lond marchethe to the kyngdom of Caldee.