Et ex speciali sciatis, istius palatij principales portas esse de Sardonico, vndìque in ebore circumcluso: sed et transuersæ lineæ sunt omnes Eburneæ, aularum et cubiculorum fenestræ christallinæ. Mensarum quaedam Smaragdinæ, aliquæ Haematistinæ, caeterorumque lapidum preciosorum per aurum sibimet coniunctorum. Et nonnullæ in toto aureæ vel gemmunculis disseminatæ, et vnaquaeque de mensis cum stabilimento proprij generis. De throni quoque preciositate, quia meæ demonstrationis excellit modum, solummodo dico, singulos ascensionis gradus esse singulorum lapidum preciosorum: Primum onychis, secundum christallai, tertium iaspidis, quartum haematisti, quintum sardij, sextum cornelij. Et septimus qui est sub sedentis Imperatoris pedibus, ipse est, chrysolitus, omnes circumfusi, et inclusoria arte formati, auro splendida relucentes. Sed et ambo throni reclinatoria ex smaragdis auro combinatis, eoque distincto nobilissimis granis, et gemmis: cuncti pilarij in camera Regis dormitoria consistunt de auro fuluo, disseminati baccis, et quampluribus carbunculorum rubetis, totum de nocte habitaculum illustrantibus. Et nihilominus in ea christallina lampas plena balsamo pistico sed ardens et lucens, tam pro augendo lumine, quàm pro corrigendo aere, tamen etiam pro ministrando optimo odore. Forma lecti Imperatoris compacta est de puris et nobilissimis Saphyris, conclusi vtique aureis vel eburneis ligaturis, vt virtute lapidum capiat suauem somnum, motusque carnis inhonesti stimuli, in eo refrenentur. Nunquam enim iungitur mulieri nisi soli coniugi propriæ, sed nec illi nisi quatuor quindenis anni videlicet in capite hyemis, veris, æstatis, et autumni causa sobolis generandæ. Vtque breuitèr transeam de multa huius palatij nobilitate, mirabile hoc solummodò praemissis super addo. Quia circa medium illius in summo apice turris maioris, duo sunt nodi seu pomella de decoctissimi auri metallo miræ magnitudinis, et serenæ resplendentiæ, et in ipsis formati duo carbunculi grandes, et lati, sua virtute tenebras effugantes, et velut splendorem plenilunij nocturno tempore mentientes. The English Version. Of the Ryalle estate of Prestre John; and of a riche man, that made a marveyllous Castelle, and cleped it Paradys; and of his Sotyltee.