Notum sit et manifestum, quòd dedimus et concessimus, ac per præsentes damus et concedimus pro nobis et hæredibus nostris, dilectis nobis Ioanni Caboto ciui Venetiarum, Lodouico, Sebastiano, et Sancio, filijs dicti Ioannis, et eorum ac cuiuslibet eorum hæredibus et deputatis, plenam ac liberam authoritatem, facultatem, et potestatem nauigandi ad omnes partes, regiones, et sinus maris orientalis, occidentalis, et septentrionalis, sub banneris, vexillis, et insignijs nostris, cum quinque nauibus siue nauigijs, cuiuscúnque portituræ et qualitatis existant, et cum tot et tantis nautis et hominibus, quot et quantos in dictis nauibus secum ducere voluerint, suis et eorum proprijs sumptibus et expensis, ad inueniendum, discooperiendum, et inuestigandum quascunque insulas, patrias, regiones siue prouincias gentilium et infidelium quorumcunque, in quacunque parte mundi positas, quæ Christianis omnibus ante hæc tempora fuerint incognitæ. Concessimus etiam eisdem et eorum cuilibet, eorumque et cuiuslibet eorum hæredibus et deputatis, ac licentiam dedimus ad affigendum prædictas banneras nostras et insignia in quacunque villa, oppido, castro, insula seu terra firma à se nouiter inuentis. Et quòd prænominatus Ioannes, et filij eiusdem, seu hæredes et eorum deputati, quascunque huiusmodi villas, castra, oppida, et insulas à se inuentas, quæ subiugari, occupari, possideri possint, subiugare, occupare, possidere valeant tanquam vasalli nostri, et gubernatores, locatenentes, et deputati eorundem, dominium, titulum et iurisdictionem earundem villarum, castrorum, oppidorum, insularum, ac terræ firmæ sic inuentorum nobis acquirendo. Ita tamen, vt ex omnibus fructibus, proficuis, emolumentis, commodis, lucris, et obuintionibus ex huiusmodi nauigatione prouenientibus, præfatus Iohannes, et filij ac hæredes, et eorum deputati, teneanter et sint obligati nobis pro omni viagio suo, toties quoties ad portum nostrum Bristolliæ applicuerint (ad quem omnino applicare teneantur et sint astricti) deductis omnibus sumptibus et impensis necessarijs per eosdem factis, quintam partem capitalis lucri facti, siue in mercibus, siue in pecunijs persoluere: Dantes nos et concedentes eisdem suisque hæredibus et deputatis, vt ab omni solutione custumarum omnium et singulorum honorum et mercium, quas secum reportarint ab illis locis sic nouiter inuentis, liberi sint et immunes. Et insuper dedimus et concessimus eisdem ac suis hæredibus et deputatis, quod terræ omnes firmæ, insulæ, villæ, oppida, castra, et loca quæcunque a se inuenta, quotquot ab eis inueniri contigerit, non possint ab alijs quibusuis nostris subditis frequentari seu visitari, absque licentia prædictorum Ioannis et eius filiorum, suorumque deputatoram, sub poena amissionis tam nauium quàm bonorum omnium quorumcunque ad ea loca sic inuenta nauigare præsumentium. Volentes et strictissimè mandantes omnibus et singulis nostris subditis, tam in terra quàm in mari constitutis, vt