Scrutatus est oras glaciales Sebastianus quidam Cabotus genere Venetus, sed à parentibus in Britanniam insulam tendentibus (vti moris est Venetorum, qui commercij causa terrarum omnium sunt hospites) transportatus penè infans. Duo is sibi nauigia, propria pecunia in Britannia ipsa instruxit, et primò tentens cum hominibus tercentum ad Septentrionem donec etiam Iulio mense vastas repererit glaciates moles pelago natantes, et lucem ferè perpetuam, tellure tamen libera, gelu liquefacto: quare coactus fuit, vti ait, vela vertere et occidentem sequi: tetenditque tantum ad meridiem littore sese incuruante, vt Herculei freti latitudinis fere gradus æquarit: ad occidentémque profectus tantum est vt Cubam Insulam à Iæua, longitudine graduum penè parem, habuerit. Is ea littora percurrens, quæ Baccalaos appelauit, eosdem se reperisse aquarum, sed lenes delapsus ad Occidentem ait, quos Castellani, meridionales suas regiones adnauigantes, inuenient. Ergò non modò verisimilius, sed necessario concludendum est, vastos inter vtramque ignotam hactenus tellurem iacere hiatus, qui viam præbeant aquis ab oriente cadentibus in Occidentem. Quas arbitror impulsu coelorum circulariter agi in gyrum circa terræ globum, non autem Demogorgone anhelante vomi, absorberique vt nonnulli senserunt, quod influxu, et refluxu forsan assentire daretur. Baccalaos, Cabotus ipse terras illas appellauit, eò quod in earum pelago tantam reperierit magnorum quorundam piscium, tynnos æmulantium, sic vocatorum ab indigenis, multitudinem, vt etiam illi interdum nauigia detardarent. Earum Regionum homines pellibus tantum coopertos reperiebat, rationis haudquaquam expertes. Vrsorum inesse regionibus copiam ingentem refert, qui et ipsi piscibus vescantur. Inter densa namque piscium illorum agmina sese immergunt vrsi, et singulos singuli complexos, vnguibusque inter squammas immissis in terram raptant et comedunt. Proptereà minimè noxios hominibus visos esse ait Orichalcum in plerisque locis se vidisse apud incolas prædicat. Familiarem habeo domi Cabotum ipsum, et contubernalem interdum. Vocatus namque ex Britannia à Rege nostro Catholico, post Henrici Maioris Britanniæ Regis mortem, concurialis noster est, expectatque indies, vt nauigia sibi parentur, quibus arcanum hoc naturæ latens iam tandem detegatur. The same in English.