Dividitur in compluria regna sive provincias: quarum nomina sunt, _Dasila, Barnagasso, Dangali, Dobas, Trigemahon, Ambiancantiva, Vangue, Bagamidri, Beleguanze, Angote, Balli, Fatigar, Olabi, Baru, Gemen, Fungi, Tirut, Esabela, Malemba_. Vrbes in universo imperio paucae sunt: vicis plurimum habitatur, domibus ex creta et stramine constructis. Rex ipse (qui albo esse colore fertur) sub tentoriis degit, quorum sex millia eum sequuntur. _Amara_ arx est munitissima, in monte _Amara_ condita; in qua regis filii sub validissimo præsidio educantur, donec patre defuncto heres producatur. CAP. X. _Æthiopia Exterior sive Inferior; item Insulæ Africæ adjacentes._ Reliquum Africæ Æthiopia perhibetur exterior sive inferior; ab Oriente, Meridie et Occidente Oceano perfusa; à Septemtrione quasi duobus brachiis Abissinorum imperium hinc inde complectitur. Regiones, in quas dividitur, sunt _Congi, Monomotapa, Zangibar_, et _Ajan_. Pleraque maritimorum à Portugalensibus tenentur firmissimis munimentis ac praesidiis. _Congi Regnum._ _Congi_ regnum (quod alliis _Manicongo_) Oceano Æthiopico perfusum, nomen habet à capite suo urbe _Congi_. Incolae sunt Christiani. Terra ipsa fluminum aquis maxime rigua. Dividitur in provincias sex; quas illi _Mani_, id est, Praefecturas, vocant. Sunt autem _Bamba, Songo, Sundi, Pango, Batta_ et _Pemba_. Regia est, civitas S. Salvatoris, quae ante _Banza_. _Monomotapa Regnum._ _Monomotapa_ vocabulum significat Imperatorem; unde ipsi terrae, cui hic imperat, nomen inditum. Solum est fertile atque amoenum; amnes aurum, silvae elephantos magna copia producunt: Clauditur regnum ab Ortu, Meridie et Occasu Oceano; à Septemtrione regno _Congi_, Abissinorum imperio et regione _Zangibar_. Longitudo ejus est inter duo maria Rubrum Æthiopicumque juxta Lunae montes milliar. German, CCCC. Latitudo inter Nili fontes et promontorium Bonæ Spei mill. CCC. Caput regni ac sedes regum est _Monomotapa_, ad flumen S. Spiritus. Hinc versus Septemtrionem mill. circiter L. distat nobile aedificium, amplum atque antiquum, quadra forma ex ingentibus saxis constructum. _Zangibar et Ajan_. Monomotapae, qua Rubro mari perfunditur, continuatur _Zangibar_ regio; cujus partes, _Cafares_ populi, Monomotapae proximi, et regna _Mozambike, Kiloa, Mombaza_ ac _Melinde_, ab urbibus singulis denominata; quarum _Mozambike_ in insula condita, celeberrimum est Europaeis mercatoribus emporium. Sequitur versus Septemtrionem juxta litus maris Rubri _Ajan_ regio, cujus partes duo regna _Del_ et _Adea Magaduzzo_. _Insulæ ad Africam_. Insularum ad Africam terram maxima est in Rubro mari Menuthias Cerne Plinio dicta; nunc vulgo insula Divi Laurentii, et incolis _Madagascar_ id est, Lunae insula, felici aromatum proventu dives, longitudine mill. German, CCL, lat. LXXX occupans.