Ad ipsum fretum Herculis Hispaniae objacet Fessanum regnum, cujus caput _Fez_, urbs totius Barbariae princeps, ingens, opulenta, frequens, splendida ac magnificis superbisque aedificiis miranda. _Tanger, Sebta, Arxilla_, amplae ad fretum urbes, Hispanicae sunt ditionis. _Regnum Maurocanum_. Caput est Maurocum, vulgo _Maroc_, amplissima ac celeberrima olim, inter maximas universi orbis memorata: at postea ab Arabibus divexata, nunc maligne colitur. Secunda est _Taradante_. _Darense Regnum_. Intus Maurocano, Fessano ac Tremiseno regnis confine est regnum Darense amplissimum, olim Caesariensis Mauritania dictum. Caput est _Dara_, unde regioni nomen, tenuibus, ut totum regnum, atque egenis incolis habitata. _Melilla_ ad mare internum conspicua urbs Hispano paret. CAP. IX. _Biledulgerit, Sarra desertum, Nigritæ, Abissini_. A Tergo dictarum regionum est _Biledulgerit_ regio, longissimo tractu ab Ægypti confinibus ad Oceanum Atlanticum porrecta. Nomen ei à dactyloram proventu inditum. Deserta in ea sunt, _Lempta, Hair, Zuenziga, Zanhaga_ à singulis opidis cognominibus, adpellata. Regna _Targa, Bardoa_ et _Gaoga_, itidem ab opidis dicta. _Sarra desertum_. Continuatur huic regioni versus Meridiem _Sarra_, cujus longitudo à regno _Gaoga_ ad regnum _Gualata_ extenditur. _Nigritæ_. Inde Nigritarum ampla est regio, ad utramque Nigri amnis ripam: longitudo ejus porrigitur à Nilo et Meroe insula, usque ad Nigri ostia et Oceanum. Regna in ea sunt haec, ab urbibus denominata: _Gualata, Hoden, Genocha, Senega, Tombuti, Melli, Bitonin, Gurnea, Temian, Dauma, Cano, Cassena, Benin, Zanfara, Guangara, Borno, Nubia, Biafra, Medra_. _Æthiopia Interior quæ est Abissinorum_. Interiori Æthiopiae imperat Abissinorum Rex, qui Presbyter sive Pretiosus Ioannes, vulgo _Prete Gianni_, vocatur; magno, recepto tamen errore; cum is quondam in Asiae, ut relatum est, regno _Tenduc_ regnaverit. Abasenos populos recenset Stephanus in Arabia; unde verisimile est, eos in Africam trajecto sinu Arabico commigrasse. Aut sane in ipsa Africa fuerunt ad sinistrum Arabici sinus latus, ubi Arabiam Troglodyticam supra memoravimus. Haec quidpe nunc sub Abissinorum imperio est. Alii tamen ab Arabico vocabulo _Elhabaschi_ (sic enim Mauri Principem Abissinorum adpellant) vulgo factum opinantur Abassi, ac deinde Abasseni; quod denique commutatione vocalium in Abissinorum nomen evasit. Clauditur regnum ab Ortu Arabico sinu et regionibus _Ajana_ ac _Zangebara_; à Meridie _Monomotapa_; ab Occasu _Congo_ et _Medar_ regnis; à Septemtrione _Nubia_ et Ægypto. Longum est ab Ægypto ad _Monomotapa_ usque mill. DLXXX. Latum inter fauces Arabici sinus et Nigrum fluvium mill. CCCCL.