[Sidenote: Chap. IX.] From this contree of the Samaritanes, that I have spoken of before, gon men to the playnes of Galilee. And men leven the hilles, on that o partye. And Galilee is on of the provynces of the Holy Land: and in that provynce is the cytee of Naym and Capharnaum and Chorosaym and Bethsayde. In this Bethseyde was Seynt Petre and Seynt Andrew borne. And thens, a 4 myle, is Chorosaym: and 5 myle fro Chorosaym, is the cytee of Cedar, of the psautre spekethe: _Et habitavi cum habitantibus Cedar_; that is for to seye, _And I have dwelled with the dwellynge men in Cedar_. In Chorosaym schalle Antecrist be born, as sum men seyn; and other men seyn, he schalle be born in Babyloyne: for the prophete seyth; _De Babilonia Coluber exiet, qui totum mundum devorabit_; that is to seyne, _Out of Babiloyne schal come a worm, that schal devouren alle the world_. This Antecrist schal be norysscht in Bethsayda, and he schal regne in Capharnaum: and therfore seythe Holy Writt: _Ve tibi, Chorosaym: ve tibi, Bethsayda: ve tibi, Capharnaum_; that is to seye, _Wo be to the, Chorosaym; wo to the, Bethsayda: wo to the, Capharnaum_. And alle theise townes ben in the lond of Galilee. And also, the cane of Galilee is 4 myle fro Nazarethe: of that cytee was Simon Chananeus, and his wif Canee; of the whiche the holy evaungelist spekethe off: there dide oure Lord the first myracle at the wedyng, whan he turned water in to wyn. And in the ende of Galilee, at the hilles, was the arke of God taken; and on that other syde is the Mownt Hender or Hermon. And there aboute gothe the Broke of Cison: and there besyde, Barache, that was Abymeleche sone, with Delbore the prophetisse, overcam the Oost of Ydumea, whan Cysera the kyng was slayn of Gebelle, the wif of Aber; and chaced beyonde the Flom Jordan, be strengthe of sword, Zeb and Zebec and Salmana; and there he slowghe him. Also a 5 myle fro Naym, is the cytee of Jezreel, that sometyme was clept Zarym; of the which cytee Jezabel the cursed queen was lady and queen, that toke awey the vyne of Nabaothe, be hire strengthe. Faste by that cytee, is the Feld Magede, in the whiche the Kyng Joras was slayn of the Kyng of Samarie, and aftre was translated and buryed in the Mount Syon. And a myle fro Jezrael ben the Hilles of Gelboe, where Saul and Jonathas that weren so faire, dyeden: wherfore David cursed hem, as holy writt seythe; _Montes Gelboe, nec Ros nec Pluvia, &c._; that is to seye, _Zee hilles of Gelboe, nouther Dew ne Reyne com upon you_. And a myle fro the hilles of Gelboe, toward the est, is the cytee of Cyrople, that was clept before Bethsayn. And upon the walles of that cytee was the hed of Saul honged.