After gon men be the hille, besyde the pleynes of Galylee, unto Nazarethe, where was wont to ben a gret cytee and fair: but now there is not, but a lytille village, and houses a brood here and there. And it is not walled; and it sytt in a litille valeye, and there ben hilles alle aboute. There was our lady born: but sche was goten at Jerusalem. And be cause that oure lady was born at Nazarethe, therefore bare our Lord his surname of that town. There toke Josephe our lady to wyf, when sche was 14 zeere of age: and there Gabrielle grette our lady, seyenge, _Ave Gratia plena, Dominus tecum_; that is to seyne, _Heyl fulle of Grace, oure Lord is with the_. And this Salutacioun was don in a place of a gret awteer of a faire chirche, that was wont to be somtyme: but it is now alle downe; and men han made a litylle resceyt, besyde a pylere of that chirche, for to resceyve the offrynges of Pilgrymes. And the Sarrazines kepen that place fulle derely, for the profyte that thei han there offe: and thei ben fulle wykked Sarrazines and cruelle, and more dispytous than in ony other place, and han destroyed alle the chirches. There nyghe is Gabrielles Welle, where oure Lord was wont to bathe Him, whan He was yong: and fro that welle bare he watre often tyme to his modre: and in that well sche wossche often tyme the clowtes of hire sone Jesu Crist. And fro Jerusalem unto thidre, is 3 journeyes. At Nazarathe was our Lord norisscht. Nazarethe is als meche to seye, as flour of the gardyn: and be gode skylle may it ben clept flour; for there was norisscht the flour of lyf, that was Crist Jesu. And 2 myle fro Nazarethe, it the cytee of Sephor, be the weye, that gothe from Nazerethe to Acon. And an half myle fro Nazarethe, is the lepe of oure Lorde: for the Jewes ladden him upon an highe roche, for to make him lepe doun, and have slayn him: but Jesu passed amonges hem, and lepte upon another roche; and zit ben the steppes of his feet sene in the roche, where he allyghte. And therfore seyn sum men, whan thei dreden hem of thefes, on ony weye, or of enemyes; _Jesus autem transiens per medium illorum ibet_; that is to seyne, _Jesus forsothe passynge be the myddes of hem, he wente_: in tokene and mynde, that oure Lord passed thorghe out the Jewes crueltee, and scaped safly fro hem: so surely mowe men passen the perile of thefes. And than sey men 2 vers of the psautre, 3 sithes: _Irruat super eos formido et pavor in magnitudine Brachii tui, Domine, Fiant inmobiles, quasi Lapis, donec pertranseat populus tuus, Domine; donec pertranseat populus tuus iste, quem possedisti_. And thanne may men passe with outen perile. And zee schulle undirstonde, that oure lady hadde child, whan sche was 15 zeere old: and sche was conversant with hire sone 33 zeer and 3 monethes; And aftre the passioun of oure Lord, sche lyvede 24 zeer.