Optimi Diamantes de India assimulantur in colore multum christallo, sed sunt aliquantulum magis citrini, et pro sui duritie poliri non possunt. Inueniuntur autem ibi nonnulli subnigri ad colorem violae: Alii nascuntur in Arabia nigri, et tenuiores praedictis, alii in Macedonia, et quidam in Cypro, sed in mineriis auri, dum prima massa in minutias confringitur, interdum reperiuntur. Sciendum enim est, saepe plures simul crescere, nec non generant, et concipiunt inuicem de rore coeli, quemadmodum et Margaritae: quod ego pluries tentans, accepi de rupe cespitem cum diamante masculo, et femella, plantans in pratello, et frequentans, focillans madefeci de rore Maii. Et ecce in breui, paruulus ex iis gignebatur, nascebatur, et adolescebat ad debitam quantitatem: fiunt vero omnes per naturam cum pluribus angulis vt trium vel quatuor, aut quinque laterum, et nonnulli cum lateribus senis. E contra omnes margaritae nascuntur in forma sphaerica, seu rotunda. Et notandum quod mercatores, pro diamantibus frequenter aliud vendunt: Nam solet commixtio fieri de christallo Crochee, de Saphiro, de Lonpes Citrino, de lapide Yri, et de paruis petris ex murium nidis. Probatio veri diamantis haberi potest his modis. Primo si ita inuenitur tener, vt se poliri dimittat non est verus. Item si de eo non potest scindi vitrum cristallum, non est verus. Item accipe paruum quantitatis lapidem Adamantem, qui solet sibi attrahere acum et ferrum, et pone verum diamantem, super adamantem, tuncque si ministraueris adamanti acum, videbis adamantem operari nihil, vero diamante praesente, dum tamen adamas non sit diamante maior. Item si cultellum laminae tenuis, habentem in manubrio inclusum vel alligatum verum diamantem in mensa vel assere erexeris, protinus vt ipsi venenum appropinquabit, stabit tremulans atque sudans. Et notandum, quod per luxuriosum, seu gulosum qui ferret diamantem amitteret virtutem ad tempus. Terra Indiae appellatur ab Indo ibi currente fluuio, cuius anguillae inueniuntur quandoque vltra 20. pedes in longitudine. In media India transitur per multas insulas vsque ad mare Oceanum, in insulam Ormuz, vbi Mercatores Venetiae saepe tendunt, sed viri, qui assueti non sunt tantum sustinere calorem, ne exeant perpendicula de corporibus prope ad genua, ibi se contra hoc debite inuoluunt, et ligant, nec audent ibi transire nauibus ferrum continentibus, ne teneantur de rupibus adamantum. Hic in aliquibus Aethiopiae partibus habitant publice, inhonestorum vtriusque sexus hominum consuetudinem inhonestam gerentes, et in aestu meridiano refrigerandi causa exeunt circa ciuitatem ad riparias iacere, et discurrere nudis prorsus corporibus omni pudore reiecto, ex quo procul dubio inhonesta vitia sequuntur.