Est et non longe ab ista insula regio seu insula Caua vel Chaua, quae a primo statu multum est minorata per mare. Hi sunt infidelissimi Paganorum. Nam quidam adorant Solem, alij Lunam, ignem, aquam, et terram, arborem, vel serpentem, vel cui de mane primo obuiant. Ibi magni mures, quos nos dicimus rattas, sunt in quantitate paruorum canum. Et quoniam per cattos capi non possunt, capiuntur per canes maiores. Corpora mortuoram non sepeliuntur ibi, nec cadauera quaelibet bestiarum operiuntur, quod ad aeris aestum carnes in breui tempore consumuntur, nam et tota insula consistit sub zona torrida. Inde transiri potest per mare in Indiam superiorem, sine maiorem, videlicet Imperium Presbyteri Ioannis ad portum ciuitatis Zarke, quae est elegans et bona satis. In ea habitant plurimi Catholicae fidei Christiani: et habentur plurimae Abbatiae religiosorum, quas olim Dux Danorum Ogerus constituit, vnde et vsque nunc dicuntur Ecclesiae Dani, atque ex hoc nauigari potest in terram Lombe. CAPVT. 27. De foresto Piperis, et fonte iuuentutis. Regio seu insula dicta Lombe, spatiosa quidem est, continens forestum dictum alias Tombar, longum per dietas 18. In orbe vniuerso non noscimus crescere piper, praeterquam in hoc foresto. In quo et habetur duae, ciuitates, vna Flandrina, (et illa ciuitas inhabitata est a Iudaeis, et Christianis, inter quos saepe magna seditio oritur) altera Singlant: quas quondam Danus fertur fundasse Ogerus, vocans vnam Flandrinam, nomine auiae suae ex parte patris sui, alteram Florentam nomine auiae ex parte matris suae, quae mutato nomine nunc vocatur Singlant. Sciendum est autem, piper ibi crescere in hunc modum: sicut nos plantamus vites aut quercus arbores robustas, vt vitis cum fructibus se spargat, vt supportetur per ramos, sic coluntur arbusta piperis ad arbores foresti, et sparguntur per ramos, et dependent fructus vt botri. Et venit in eodem arbusto triplex piper in anno. Primum est quod vocatur longum piper, et venit priusquam nascuntur folia in arbustis, quemadmodum nos in arbore videmus corylo in hyeme ante folia praecedere quasdam caudulas longas, quo circa initium vindemiato, nascuntur cum foliis botri piperis viridis ad similitudinem paruarum vuarum. Quod quidem circa tempus Iulii in eadem viriditate vindemiatum in aestu feruido siccatur ad Solem, vt accipiat nigredinem, et rugarum contractionem. Postea exurgit piper album in granis minoribus, et in abundantia satis minori, quo tanquam preciosiori vtuntur in partibus illis et raro vendunt ad partes istas. Primum piper appellatur Sorbotyn, secundum Fulful, tertium vero Bauos. Sunt autem per nemus istud fera animalia, et venenosa, sicut parui serpentes, colubri, et huiusmodi, de quibus nescio quis famam diffundit per nostras partes, quod vindemiatores piperis tales vermes fugant per ignem: sed non est ita, imo vngunt brachia manus, tibias, et pedes cum quodam succo herbae dictae Limonse, a quo cito diffugit omne venenum.