There ben othere, that men clepen Georgyenes, that seynt George converted; and him thei worschipen, more than ony other seynt; and to him thei cryen for help: and thei camen out of the reme of George. Theise folk usen crounes schaven. The clerkes han rounde crounes, and the lewed men han crownes alle square: and thei holden Cristene lawe, as don thei of Grece; of whom I have spoken of before. Othere there ben, that men clepen Cristene men of Gyrdynge: for thei ben alle gyrt aboven. And ther ben othere, that men clepen Nestoryenes; and summe Arryenes, sume Nubyenes, sume of Grees, same of Ynde, and sume of Prestre Johnes Lond. And alle theise han manye articles of oure feythe, and to othere thei ben varyaunt. And of here variance, were to longe to telle; and go I wil leve, as for the tyme, with outen more spekynge of hem. Of the Cytee of Damasce. Of 3 Weyes to Jerusalem; on be Londe and be See; another more be Londe than be See; and the thridde Weye to Jerusalem, alle be Londe. [Sidenote: Chap. XI] Now aftre that I have told zou sum partye of folk, in the contrees before, now wille I turnen azen to my weye, for to turnen azen to this half. Thanne whoso wil go fro the lond of Galilee, of that that I have spoke, for to come azen on this half, men comen azen be Damasce, that is a fulle fayre cytee, and fulle noble, and fulle of alle merchandises, and a 3 journeyes long fro the see, and a 5 journeyes fro Jerusalem. But upon camaylles, mules, hors, dromedaries and other bestes, men caryen here merciandise thidre: and thidre comethe marchauntes with merchandise be see, from Yndee, Persee, Caldee, Ermonye, and of manye othere kyngdomes. This cytee founded Helizeus Damascus, that was Zoman and Despenser of Abraham, before that Ysaac was born: for he thoughte for to have ben Abrahames heir: and he named the toun aftre his surname Damasce. And in that place, where Damasc was founded, Kaym sloughe Abel his brother. And besyde Damasc is the Mount Seyr. In that cytee of Damasce, ther is gret plentee of welles: and with in the cytee and with oute, ben many fayre gardynes, and of dyverse frutes. Non other citee is not lyche in comparisoun to it of faire gardynes, and of faire desportes. The cytee is gret and fulle of peple, and wel walled with double walles. And there ben manye phisicyens. And seint Poul him self was there a physicyen, for to kepen mennes bodies in hele, before he was converted: and aftre that, he was phisicien of soules. And seynt Luke the Evaungelist was Disciple of seynt Poul, for to lerne phisik; and many othere. For seynt Poul held thanne scole of phisik. And neere besyde Damasce, was he converted: and aftre his conversionn, he duelte in that cytee 3 dayes, with outen sight, and with outen mete or drinke. And in tho 3 dayes he was ravisscht to hevene, and there he saughe many prevytees of oure Lord. And faste besyde Damasce, is the Castelle of Arkes, that is bothe fair and strong. From Damasce, men comen azen, be oure Lady of