And zee schulte undirstonde, that amonges the Sarazines, o part and other, duellen many Cristene men, of many maneres and dyverse names; and alle ben baptized, and han dyverse lawes and dyverse customes: but alle beleven in God the Fadir and the Sone and the Holy Gost: but alle weys fayle thei, in somme articles of oure feythe. Some of theise ben clept Jacobytes: for seynt Jame converted hem, and seynt John baptized hem. They seyn, that a man schal maken his confessioun only to God, and not to a man: for only to Him, scholde man zelden him gylty of alle, that he hathe mys don. Ne God ordeyned not, ne never devysed, ne the prophete nouther, that a man scholde schryven him to another, (as thei seyn) but only to God: as Moyses writethe in the Bible, and as David seythe in the Psawtre boke; _Confitebor tibi, Domine, in toto Corde meo_: and, _Delictum meum tibi cognitum feci_: and, _Deus meus es tu, et confitebor tibi_; and, _Quoniam cogitatio hominis confitebitur tibi_; &c. Fot thei knowen alle the bible, and the psautere: and therfore allegge thei so the lettre: but thei alleggen not the aucthoritees thus in Latyn, but in here langage, fulle appertely; and seyn wel, that David and othere prophetes seyn it. Natheles seynt Austyn and seynt Gregory seyn thus: Augustinus; _Qui scelera sua cogitat, et conversus fuerit, veniam sibi credat_. Gregorious; _Dominus potius mentem quam verba respicit_. And seynt Hillary seythe; _Longorum temporum crimina, in ictu Oculi pereunt, si Cordis nata fuerit compunctio_. And for suche auctoritees, thei seyn, that only to God schalle a man knouleche his defautes, zeldynge him self gylty, and cryenge him mercy, and behotynge to him to amende him self. And therfore whan thei wil schryven hem, thei taken fyre, and sette it besyde hem, and casten therin poudre of frank encens; and in the smoke therof, thei schryven hem to God, and cryen him mercy. But sothe it is, that this confessioun was first and kyndely: but seynt Petre the apostle, and thei that camen aftre him, han ordeynd to make here confessioun to man; and be gode resoun: for thei perceyveden wel, that no syknesse was curable, by gode medycyne to leye therto, but zif men knewen the nature of the maladye. And also no man may zeven covenable medicyne, but zif he knowe the qualitee of the dede. For o synne may be grettere in o man than in another, and in o place and in o tyme than in another: and therfore it behovethe him, that he knowe the kynde of the dede, and thereupon to zeven him penance. There ben othere, that ben clept Surienes; and thei holden the beleeve amonges us, and of hem of Grece. And thei usen alle berdes, as men of Grece don: and thei make the sacrament of therf bred: and in here langage, thei usen lettres of Sarrazines; but aftre the misterie of Holy chirche, thei usen lettres of Grece; and thei maken here confessioun, right as the Jacobytes don.