Intratur hinc per Oceanum in regionem Niconoram, vel Nacumeram, habentem in circuitu spacium mille leucarum: omnes ibi geniti homines habent capita ad formam canum, vnde et in Graeco Cynocephali dicuntur. Isti etiam incedunt nudis corporibus, excepto parui panniculi operimento, secretiora loca et posteriora retro tegente. Rationabiles tamen multum sunt hij, et plurimum virtuosi, ac de omni forefacto rigidam iustitiam exercentes. Sunt statura elegantes, robusti corpore, in praelijs lanceam cum tergia lata gerentes, viriliterque, et prudenter pugnantes. Omnes pro deo adorant bouem, vnde et quilibet in fronte argenteam seu auream similitudinem bouis defert, et si quem viuum in praelio ceperint, sine vlla miseratione manducant. Rex multum est diues et potens, ac deuotus in superstitione. Nam circa collum gestat trecentas orientales margaritas, quibus quotidie ante commestionem orationes suas colligit, quemadmodum nos colligimus, Pater noster, etc. Ac praeterea portat ad collum [Marginal note: Siue carbunculum.] rubetum orientalem, nobilem, purum, pulchrum, resplendentem, et summe preciosum, ad longitudinem pedis humani, quem habet diligenter seruare, quod dum eo caret non tenetur pro Rege. Pro isto carbunculo Grand Can Imperator, per ingenium, per insidias, per precium, et per praelium saepe laborauit, sed nihil profecit. Post istam apparet insula Syllan, habens leucas de circuitu 80. quae paucos habet homines propter multitudinem draconum, serpentum, crocodilorum in ea. Sunt autem crocodili speciales serpentes, coloris virgulati de croceo et nigro, cum quatuor cruribus, et tibijs et latis pedum vngulis. Aliqui horum habent longitudinem quinque tensarum, aut citra, qui dum tendunt per arenosa relinquunt signum semitae, acsi sit ibi tractus grandis arboris truncus. Item in hac insula habetur nons altus, et in sui vertice satis altus et distentus et magnus aquae lacus, de quo et stulti homines fabulantur, quod primi parentes post eiectionem suam, illam aquam primo lacrymauerunt. In huius fundo lacus nascuntur margaritae, et habentur semper lapides preciosi. Solentque pauperes terrae, accepta a Rege licentia, semel in anno ingredi, ac piscari gemmas, qui intrantes vngunt se succo Lymonsae, contra hirudines, colubros, et serpentes. Sed et de lacu effluit riuulus per montis descensum, in quo nonnunquam margaritae inueniuntur, et gemmae: dicunt etiam ibi nullum venenatum animal nocere aduenis. Ibi videntur leones albi in mira magnitudine boum nostrorum, et multae diuersae bestiae, et aues, bestiolae, et auiculae aliarum specierum quam in partibus istis. Nam ibi et in nonnullis alijs insulis vidi vnum mirum, de quo prius vix credidissem narranti, videlicet anates cum duobus capitibus. Et sciatis quod tam hic quam alibi mare apparet satis altius suo littore, imo qui a remotis aspicit videt suspensum quasi ad nubes. Et de hoc admiratus fuissem, nisi quod scriptum sciui mirabiles elationes maris. CAPVT. 31.