Nota, quilibet ignis soluit quolibet anno vnum balis pro tributo, quod valet vnum florenum cum dimidio, sed omnes famuli de domo vna pro vno igne computantur: summa ignium tributalium, octies centum millia. Reliqui vero Christiani mercatores, in isto vico non computantur. Copia est ibi victualium. Quatuor fratres minores vnum potentem conuertebant apud quem hospitabar, et qui duxit me ad Abbatiam istam, ibi vidi scilicet quod hic narratur. Ad fines itaque regni Mangi transitur grandis fluuius de Dylay, [Marginal note: Vel de Delay.] maius flumen mundi, vbi strictius est continet septem miliaria Odericus: cuius alueus in loco districtiori continet quatuor leucas. Et ex hoc in breui temporis spacio intratur Imperium Tartarorum, sequendo fluuium vsque in terram Pygmeorum, per cuius medium transit. Hij Pygmei sunt homines statura breues ad longitudinem nostri brachij, seu trium manuum expansarum. Tam mares quam feminae formosae et gratiosae, et viuunt communiter ad annos sex vel septem: si qui pertingunt ad octo, mire putantur senectutis. Ad dimidiam anni aetatem nubere possunt, in secundo anno parturiunt: rationalis sunt, et sensati iuxta aetatem pusillam, ac satis ingeniosi ad opera de serico, et de lana arboris. Frequenter praeliantur contra aues grandes patriae, exercitibus congregatis hinc inde, et fit strages vtrimque. Haec gens tam parua optime operatur sericum et bombycem. Isti Pygmei venerunt mihi obuiam chorizando. Non laborant terram, praedia, seu vineas, sed morantur inter eos nostrae quantitatis homines, qui eos incolunt, sicut serui, quos et Pygmaei saepe derident, quia sunt ipsis maiores: et quod ipse non cesso mirari dum dicti homines in illa terra generant vel pariunt, non crescit proles supra Pygmaei staturam: Insula non est protensa, sed forte 12. ciuitatum. Quarum vna est grandis, et bene munita, et quam Grand Can facit cum fortibus armaturis curiose seruari, contra regem Mangi. Hinc proceditur per Imperium Grand Can, ad multas ciuitates, et villas morum mirabiliter diuersorum, vsque in regnum Iamchan, quod est vnum de 12. prouincijs maximis, quibus distinguitur totum Imperium Tartarorum. Nobilior ciuitas huius Regni seu Prouinciae dicitur Iamchan, abundans mercimonijs, et diuitijs infinitis, et multa praestans proprio Regi tributa, quoniam sicut illi de ciuitate fatentur, valet annue regi quinquaginta milia cuman florenorum auri. Nota. In Iamchan ciuitate est conuentus fratrum minorum: in hac sunt tres Ecclesiae Monasteriorum: reditus simul ascendit ad 12. cuman. Odericus dixit, Vnus cuman est decem millium. Summa tributi annui, quinquaginta milia millium Florenorum. In illis namque partibus magnus numerorum summas estimant per cuman, numerum 10. millium qui et in Flamingo dicitur laste. Ad quinque leucas ab hac ciuitate est alia dicta Meke, in qua fiunt de quodam albissimi genere ligni naues maxtimae cum aulis et thalamis, ac multis aedificijs, tanquam Palatium tellure fundatum.