Aftre passe men overthwart a gret ryvere, that men clepen Dalay: and that is the grettest ryvere of fressche water, that is in the world. For there, as it is most narow, it is more than a myle of brede. And thanne entren men azen into the lond of the grete Chane. That ryvere gothe thorghe the lond of Pigmaus: where that the folk ben of litylle stature, that ben but 3 span long: and thei ben right faire and gentylle, aftre here quantytees, bothe the men and the wommen. And thei maryen hem, whan thei ben half zere of age, and geten children. And thei lyven not, but 6 zeer or 7 at the moste. And he that lyvethe 8 zeer men holden him there righte passynge old. Theise men ben the beste worcheres of gold, sylver, cotoun, sylk, and of alle suche thinges, of ony other, that be in the world. And thei han often tymes werre with the briddes of the contree, that thei taken and eten. This litylle folk nouther labouren in londes ne in vynes. But thei han grete men amonges hem, of oure stature, that tylen the lond, and labouren amonges the vynes for hem. And of tho men of oure stature, han thei als grete skorne and wondre, as we wolde have among us of geauntes, zif thei weren amonges us. There is a gode cytee, amonges othere, where there is duellynge gret plentee of tho lytylle folk: and it is a gret cytee and a faire, and the men ben grete, that duellen amonges hem: but whan thei geten ony children, thei ben als litylle as the pygmeyes: and therfore thei ben alle, for the moste part, alle pygmeyes; for the nature of the lond is suche. The grete Cane let kepe this cytee fulle wel: for it is his. And alle be it, that the pygmeyes ben lytylle, zit thei ben fulle resonable, aftre here age, and connen bothen wytt and gode and malice, y now.