Fro that cytee, gon men be the contree, be many cytees and many townes, unto a cytee, that men clepen Jamchay: and it is a noble cytee and a riche, and of gret profite to the lord: and thidre go men to sechen marchandise of alle manere of thing. That cytee is fulle moche worthe zerly to the lord of the contree. For he hathe every zere to rente of that cytee (as thei of the cytee seyn) 50000 cumantz of floreyns of gold: for thei cownten there alle be cumanz: and every cumant is 10000 floryns of gold. Now may men wel rekene, how moche that it amountethe. The kyng of that contree is fulle myghty: and zit he is undre the grete Cane. And the gret Cane hathe undre him 12 such provynces. In that contree, in the gode townes, is a gode custom. For whoso wille make a feste to ony of his frendes, there ben certeyn innes in every gode toum; and he that wil make the feste, wil seye to the hostellere, arraye for me, to morwe, a gode dyner, for so many folk; and tellethe him the nombre; and devysethe him the viaundes: and he seythe also, thus moche I wil dispende, and no more. And anon the hostellere arrayethe for him, so faire and so wel and so honestly, that ther schalle lakke no thing. And it schalle be don sunnere, and with lasse cost, than and a man made it in his owne hous. And a 5 myle fro that cytee, toward the hed of the ryvere of Dalay, is another cytee, that men clepen Menke. In that cytee is strong navye of schippes; and alle ben white as snow, of the kynde of the trees, that thei ben made offe. And thei ben fulle grete schippes, and faire, and wel ordeyned, and made with halles and chambres, and other eysementes, as thoughe it were on the lond. Fro thens go men be many townes and many cytees, thorghe the contree, unto a cytee, that men clepen Lanteryne: and it is an 8 iourneyes from the cytee aboveseyd. This cytee sitt upon a faire ryvere, gret and brood, that men clepen Caramaron. This ryvere passethe thorghe out Cathay: and it dothe often tyme harm, and that fulle gret, whan it is over gret. Of the grete Chane of Chatay. Of the Rialtee of his Palays, and how he sitt at Mete; and of the grete nombre of Officeres, that serven hym. [Sidenote: Cap. XX.] Chatay is a gret contree and a faire, noble and riche, and fulle of marchauntes. Thidre gon marchaundes alle zeres, for to sechen spices and alle manere of marchandises, more comounly than in ony other partye. And zee schulle undirstonde, that marchaundes, that comen fro Gene or fro Venyse or fro Romanye, or other partyes of Lombardye, thei gon be see and be lond 11 monethes, or 12, or more sum tyme, or thei may come to the yle of Cathay, that is the princypalle regyoun of alle partyes bezonde; and it is of the grete Cane.