Ad Imperatoris sinistram gradu vno bassior, est sedes suae primae coniugis, tota de iaspidibus auro circumfusis, et in superficie aulae distinctae gemmulae cum granellis eodem schemate, et similiter de iaspide. Sed adhuc submissior vno gradu est sedes coniugis secundae, nec non et sub illa vxoris tertiae. Nam tres proprias secum habet vxores, Odericus dicit, istas duas concubinas. Itemque resident sub tertia coniuge nobiles mulieres de Imperatoris progenie, iuxta illustriam vniuscuiusque. Et notandum, quod per totam patriam singulae mulieres maritatae, vt intelligantur maritis subiectae, et vt discernantur a solutis, gestant in capitis summitate similitudinem pedis viri, longitudinis brachij et dimidij, quadam leui materia operatam: videlicet nobiles de sericosis operibus pannorum, seu alijs raris et pulchris pannis, et preciosis lapillis, et ignobiles iuxta statum suum de materia communiori. Ad dextram vero sedentis Imperatoris vno gradu submissus residet primogenitus eius filius, et sub ipso ordinate in consimilibus sedibus nobiles proximi de cognitione Imperiali. Item super thronum et desuper ante ipsius throni locum, tanquam pro celato seu operimento in throno residentium, et eorum ministrantium, est extensa similitudo vitis operata in palmitibus, et pampinis, de auro puro ad extensionem cubitorum quadraginta, per quadrum, atque per eam dependentes botri vuarum de gemmis, et granellis quinque colorum, quorum albi sunt de christallo et beryllo, et iriscrocei de topazio et fuluo christallo, rubei de rubetorum granis, corallo, et alibandinis, virides de Smaragdis, pyropis, et chrysolytis, nigri, de onichinis, gagetis, et gerateris. Tempore prandij in hac aula, Imperator et Imperatrices, et quisque de praedictis, habet mensam sibi solam, quarum vilior praeualet thesauro grandi. In solennitatibus ponitur mensa Imperatori de exquisito electro, seu de auro examinato, distincta diamantibus, et nobis ignotis in comparabilibus gemmis, quandoque de christallo perspicuo, seu croceo, circumclusa auro cum gemmis: quandoque de Haematisto, quandoque de ebore candido, vel rubicundo: interdum de ligno artificiose combinato, quod descendit per flumina de Paradiso. Idem dicit Odericus. His mensis astant Barones, et Principes pro vasallis attente in suis officijs ministrantes, quorum nec vnus emittere verbum aliqua praesumit audacia, nisi Imperatore annuente, vel ad illum loquente, illis duntaxat exceptis, qui certis interspatijs canunt, aut recitant de principum gestis. Et notandum, quando in hoc solio Maiestatis diebus solennibus residet Imperator, subsidere ad pedes eius notarios quatuor, qui omne quod Dominus loquitur, singuli ponunt in scriptis: nam quodcunque tunc ex ore illius egreditur, necesse est esse, vel effici, nec valet item ipse verbum suum mutare, nec reuocare, nisi magno consilio conuocato.