Vniuersa vtensilia quibus in solennitate ad has seruitur mensas, sunt de nobilibus petris auro reclusis, Cyphi de Smaragdis, vel Saphyris, topasijs, pyropis, siue gryophis: et priuatioribus diebus, de auro probato etiam in cameris, et cubiculis, nec reputatur ibi claritas argenti, nisi pro pilarijs, columnis, gradibus, et pauimentis. Istius autem ostia aulae, dum in ea residet, aut deambulat Imperator, multi Barones ingressum seruant intente, et ne limen tangatur, quod hoc haberent pro augurio, et bene verberaretur, quia Imperatore praesente, nemo nisi adductus in quacunque camera, vel habitatione intromittitur, donec interrogatus iusserit Imperator. Latitudinem huius Basilicae aestimo ad spatium de meis pedibus centum et longitudinem vltra quatuor centum. In cubiculo autem Regis dormitorio, constat vnus pillarius, seu columna de auro solido et carbunculus conclusus in illo longitudinis pedis vnius, totum habitaculum de nocte perfundens lumine claro. Hic prout ego notaui, non est plene rubeus, sed subrufus, quasi coloris Haematistini. Porro in vna aularum, circa medium palatii, est alius excelsus ascensus, Odericus dicit pigma, super quem dum placet, stat, vel residet Imperator, ditissime etiam operatus, ex auro, gemmis, baccis, margaritis, et lapidibus raris, et in quatuor angulis, imagines quatuor serpentum de auro puro. Huius per tria latera dependent retia seu cortinae de cordulis sericis, in quibus ad singulos nodos, grossa margarita habetur innexa, quibus cortinis tegitur officina: in eius concauitate tenetur tumba quadrata, in qua conueniunt conductus omnium potuum, qui bibuntur in Curia, et innumera vasorum genera, quibus potus omnibus ministratur. Praeterea, iuxta palatii ambitum, habetur grandis parci spaciamentum, diuersi generis arboribus repletum, fructus ferentibus varios, et nobis inuisos, et in parte media, aula super excelsum collem de tam mira et pulchra structura, vt eius nobilitas de facili ad praesens, non possit describi. Et vndique, par collis gyrum aquae fossatum profundum, et latum vltra quod pons vnicus ducit ad collem. Atque ex duobus montis lateribus, stagnum cum diuersorum copia piscium, et volucrum indomitarum, vt aucarum, anatum, cignorum, ciconiarum, ardearum, et collectorum in magna pluralitate, nec non et per parcum, multae syluestres bestiae, et bestiolae quatenus per aulae fenestras possit Dominus pro solatio respicere volucrum aucupationes, bestiarum venationes, et piscium captiones. Et hoc proculdubio sciendum, quod in nostris partibus rara sint oppida cum pluribus mansionibus, quam in isto palatio continentur. Tota aestate moratur in India terra frigidissima, in hyeme in Cambalu. Odericus.