Est autem currus quatuor rotarum duntaxat, quem trahunt quatuor Elephantes ad hoc curiose instructi, cum quatuor hippis albis equae doctis et ipsi cooperti ditissimis tegumentis, ac praeter aurigas nobiliter indutos, qui currum cautissime ducunt, adsunt et quatuor de maioribus palatii Dominis, inde ad vehiculum habentes iugem curam, de minatione eius, et ne vltimo exercitu appropriet infra iactum (vt dixi) sagittae. Ipse autem interdum pro sodalitate iubet secum ascendere quam vult personam, sed minime vltra duos. In cellae quoque culmine, quod aperiri valet et claudi, astant in pertica quatuor grifandi, vel ostiones. Odericus: duodecim Girfalcones, vt si forte Imperator in aere aquilam, vulturum, ardeam, vel collectorem cerneret, cito dimitteret istorum duas aut plures ad aucupandum. Nota, per Dromedarios, et cursores, et veloces, qui de hospitio ad hospitium permutantur, scit de remotis noua. Cursor enim appropinquans cornu sonat, et tunc alius praeparat, et vlterius currit. Odericus. Sciendumque tam primogenitum Regis, quam singulas de tribus vxoribus ducere similem apparatum in itinerando post ipsum; scilicet cum quatuor comitatibus, ante, et retro, et a lateribus, sed in valde minori numero personarum pro placito, et in singulis curribus sequentibus se inuicem per vnam dietam. Praemissa omnia sic fiunt, dum Imperatori tendendum est remote, alias autem minuuntur, et distinguuntur comitatus, iuxta quod decet, vt nonnunquam omnes Imperatores etiam cum filio simul tendant, cum vna comitatuum distinctione. Transeunte autem sic Imperatore per ciuitates et villas quilibet ante fores proprias praeparato igne iactat poluerem aromata redolentem, stans genibus flexis ad reuerentiam illi. Et sciatis vbi prope transitum illius habentur Christianae Abbatiae, quas olim constituit Dux Ogerus, exeunt obuiam illi in processione cum vexillis, et sancta cruce, et aqua benedicta, et thuribulo, hymnum, Veni Creator spiritus decantantes. Nota: Ego semel cum Episcopo nostro, et alijs fratribus, uimus obuiam per duas dietas, et portaui thuribulum. Odericus. Quos ipse a remotis videns, consueuit ad se appellare, et ad crucem suum galeatum deponere, ac reuerenter nudo capite inclinare: et praelatus dicens super cum aliquam orationem signat cruce, et aqua benedicta aspergit. Et quoniam necesse est, vt quisque extraneus ante Regem apparens, offerat ei aliquid, praelatus in disco praesentat ei fructus, et poma, vel pyra, et hoc in numero nouenario, (ratio ponitur primo capitullo proximo, quod iste numerus est plus caeteris acceptus,) de quibus Imperator vnum sibi sumens, reliqua tradit Dominis praesentibus: quo facto habent relligiosi recedere cito, ne opprimantur multitudine populi subsequentis.