Praefatum Domini galeatum, est ita intextum auro, diamantibus, gemmunculis, et orientalibus margaritis, granellis, et dubletis, et praediues in materia et artificio, vt ei non sit aequandus magni in partibus istis Regis thesaurus. Item sicut haec fiunt transeunti Imperatori, fiunt et Imperatricibus, et filio seniori. The English Version. And zee schulle undirstonde, that my felawes and I, with oure zomen, we serveden this emperour, and weren his soudyoures, 15 monethes, azenst the Kyng of Mancy, that held werre azenst him. And the cause was, for we hadden gret lust to see his noblelesse and the estat of his court and alle his governance, to write zif it were suche, as wee herde seye, that it was. And treuly, we fond it more noble and more excellent and ricchere and more marveyllous, than ever we herde speke offe; in so moche, that we wolde never han leved it, had wee not seen it. For I trowe, that no man wolde beleve the noblesse, the ricchesse, ne the multytude of folk that ben in his court, but he had seen it. For it is not there, as it is here. For the lordes here han folk of certeyn nombre, als thei may suffise: but the grete Chane hathe every day folke at his costages and expenses, as with outen nombre. But the ordynance, ne the expenses in mete and drynk, ne the honestee ne the clennesse, is not so arrayed there, as it is here: for alle the comouns there eten withouten clothe upon here knees; and thei eten alle maner of flessche, and litylle of bred. And aftre mete, thei wypen here hondes upon here skyrtes: and thei eten not but ones a day. But the estat of lordes is fulle gret and riche and noble. And alle be it, that sum men wil not trow me; but holden it for fable, to telle hem the noblesse of his persone and of his estate and of his court and of the gret multytude of folk, that he holt, natheles I schalle seye zou, a partye of him and of his folk, aftre that I have seen, the manere and the ordynance, fulle many a tyme. And whoso that wole, may leve me, zif he wille; and who so wille not, may chuse. For I wot wel, zif ony man hathe ben in tho contrees bezonde, thoughe he have not ben in the place, where the grete Chane duellethe, he schalle here speke of him so meche merveylouse thing, that he schalle not trowe it lightly: and treuly, no more did I my self, til I saughe it. And tho that han ben in tho contrees and in the gret Canes houshold, knowen wel, that I seye sothe. And therfore I wille not spare, for hem that knowe not, ne beleve not, but that that thei seen, for to telle zou a partie of him and of his estate, that he holt, whan he gothe from contree to contree, and whan he makethe solempne festes. CAPVT. 37. Qua de causa dicitur Grand Gan.