armes, scholden ben nombred: and to every 10 scholde ben a maystre, and to every 100 a maystre, and to every 1000 a maystre, and to every 10000 a maystre. Aftre he commanded to the princypales of the 7 lynages, that thei scholde leven and forsaken alle that thei hadden in godes and heritage; and fro thens forthe to holden hem payd, of that that be wolde zeve hem of his grace. And thei diden so anon. Aftre he commanded to the princypales of the 7 lynages, that every of hem scholde brynge his eldest sone before him, and with here owne handes smyten of here hedes, with outen taryenge. And anon his commandement was performed. And whan the Chane saghe, that thei made non obstacle to performen his commandement, thanne he thoughte wel, that he myghte trusten in hem, and commanded hem anon to make hem redy, and to sewen his banere. And aftre this, Chane putt in subieccioun alle the londes aboute him. Aftreward it befelle upon a day, that the Cane rood with a fewe meynee, for to beholde the strengthe of the contree, that he had wonnen: and so befelle, that a gret multytude of his enemyes metten with hem; and for to zeven gode ensample of hardynesse to his peeple, he was the firste that faughte, and in the myddes of his enemyes encountred; and there he was cast from his hors, and his hors slayn. And whan his folk saughe him at the erthe, thei weren alle abasscht, and wenden he had ben ded, and flowen everych one; and hire enemyes aftre, and chaced hem: but thei wiste not, that the emperour was there. And whan thei weren comen azen fro the chace, thei wenten and soughten the wodes, zif ony of hem had ben hid in the thikke of the wodes: and manye thei founden and slowen hem anon. So it happend, that as thei wenten serchinge, toward the place that the emperour was, thei saughe an owle sittynge upon a tree aboven hym; and than thei seyden amonges hem, that there was no man, be cause that thei saughe that brid there: and to thei wenten hire wey; and thus escaped the emperour from dethe. And thanne he wente prevylly, alle be nyghte, tille he cam to his folk, that weren fulle glad of his comynge, and maden grete thankynges to God immortalle, and to that bryd, be whom here lord was saved. And therfore princypally aboven alle foules of world, thei worschipen the owle: and whan thei han ony of here fedres, thei kepen hem fulle precyously, in stede of relykes, and beren hem upon here hedes with gret reverence: and thei holden hem self blessed and saf from alle periles, while that thei han hem upon hem; and therfore thei beren here fedres upon here hedes. Aftre alle this the Cane ordeyned him, and assembled his peple, and wente upon hem that hadden assayled hym before, and destroyed hem, and put hem in subieccioun and servage. And whan he had wonnen and putt alle the londes and contrees, on this half the Mount Belyan, in subieccioun, the whyte knyght cam to him azen in his sleep, and seyde to him, Chan, the wille of God immortalle is,