that thou passe the Mount Belyan; and thou schalt wynne the lond, and thou schalt putten many nacyouns in subieccioun: and for thou schalt fynde no gode passage for to go toward that contree, go to the Mount Belyan, that is upon the see, and knele there 9 tymes toward the est, in the worschipe of God immortalle; and he schal schewe the weye to passe by. And the Chane dide so. And anon the see, that touched and was fast to the mount, began to withdrawe him, and schewed fair weye of 9 fote brede large; and so he passed with his folk, and wan the lond of Cathay, that is the grettest kyngdom of the world. And for the 9 knelynges, and for the 9 fote of weye, the Chane and alle the men of Tartarye han the nombre of 9 in gret reverence. And therfore who that wole make the Chane ony present, be it of hors, be it of bryddes, or of arwes, or bowes, or of frute, or of ony other thing, alweys he most make it of the nombre of 9. And so thanne ben the presentes of grettere plesance to him, and more benygnely he wil resceyven hem, than though he were presented with an 100 or 200. For hym semethe the nombre of 9 so holy, be cause the messagre of God immortalle devised it. Also whan the Chane of Cathay hadde wonen the contree of Cathay, and put in subieccioun and undre fote many contrees abouten, he felle seek. And whan he felte wel, that he scholde dye, he seyde to his 12 sones, that everyche of hem scholde brynge him on of his arewes; and so thei diden anon. And thanne he commanded, that men scholde bynden hem to gedre, in 3 places; and than he toke hem to his eldest sone, and bad him breke hem alle to gedre. And he enforced hem with alle his myght to breken hem: but he ne myghte not. And than the Chane bad his seconde sone to breke hem; and so schortly too alle, eche aftre other: but non of hem myght breke hem. And than be bad the zongest sone dissevere everyche from other, and breken everyche be him self: and so he dide. And than seyde the Chane to his eldest sone, and to alle the othere, Wherfore myght zee not breke hem? And thei answereden, that thei myght not, be cause that thei weren bounden to gydre. And wherfore, quothe he, hathe zoure litylle zongest brother broken hem? Because, quothe thei, that thei weren departed eche from other. And thanne seyde the Chane, My sones, quoth he, treuly thus wil it faren be zou. For als longe as zee ben bounden to gedere, in 3 places, that is to seyne, in love, in trouthe and in gode accord, no man schalle ben of powere to greve zou; but and zee ben disevered fro theise 3 places, that zoure on helpe not zoure other, zee schulle be destroyed and brought to nought: and zif eche of zou love other, and helpe othere, ze schulle be lordes and sovereynes of alle othere. And whan he hadde made his ordynances, he dyed. And thanne after hym, regned Ecchecha Cane his eldest sone. And his othere bretheren wenten to wynnen hem many contrees and kyngdomes, unto the lond of Pruysse