and of Rossye, and made hem to ben cleped Chane: but thei weren all obeyssant to hire eldre brother: and therfore was he clept grete Chane. Aftre Ecchecha, regned Guyo Chane: and aftre him, Mango Chan, that was a gode Cristene man, and baptized, and zaf lettres of perpetuelle pes to alle Cristene men, and sente his brother Halaon with gret multytude of folk, for to wynnen the Holy Lond, and for to put it in to Cristene mennes hondes, and for to destroye Machametes lawe, and for to take the Calyphee of Baldak, that was emperour and lord of alle the Sarazines. And whan this Calyphee was taken, men fownden him of so highe worschipe, that in alle the remenant of the world, ne myghte a man fynde a more reverent man, ne highere in worschippe. And then Halaon made him come before him, and seyde to hym: Why, quoth be, haddest thow not taken with the mo sowdyoures, and men y nowe, for a lytille quantytee of thresour, for to defende the and thi contree, that art so habundant of tresore and so high in alle worschipe? And the Calyphee answered him, For he wel trowede, that he hadde y nowe of his owne propre men. And than seyde Halaon, Thou were as a god of the Sarazines: and it is convenyent to a god, to ete no mete, that is mortalle; and therfore thou schalt not ete, but precyous stones, riche perles, and tresour, that thou lovest so moche. And then he commanded him to presoun, and alle his tresoure aboute him; and so he dyed for hungre, and threst. And than aftre this, Halaon wan alle the lond of promyssioun, and putte it in to Cristene mennes hondes. But the grete Chane his brother dyede; and that was gret sorwe and losse to alle Cristen men. Aftre Mango Chan, regned Coblya Chan, that was also a Cristene man: and he regnede 42 zere. He founded the grete cytee Izonge in Cathay, that is a gret del more than Rome. The tother gret Chane, that cam aftre him, becam a Payneme, and alle the other aftre him. The kyngdom of Cathay is the grettest reme of the world. And also the gret Chan is the most myghty emperour of the world, and the grettest lord undre the firmament; and so he clepethe him in his lettres, right thus, _Chan, filius Dei excelsi, omnium universam Terram colentium summus Imperatur, et Dominus omnium Dominantium_. And the lettre of his grete seel, writen abouten, is this, _Deus in Celo, Chan super Terram, ejus fortitudo. Omnium hominum Imperatoris Sigillum_. And the superscripcioun aboute his litylle seel is this, _Dei Fortitudo omnium hominum. Imperatoris Sigillum_. And alle be it that thei be not cristned, zit natheles the emperour and alle the Tarterynes beleeven in God immortalle. And whan thei wille manacen ony man thanne thei seyn, God knowethe wel, that I schalle do the suche a thing, and tellethe his menace. And thus have zee herd, whi he is clept the grete Chane. Of the governance of the grete Chanes Court, and whan he makethe solempne Festes. Of his Philosophres. And of his Array, whan he riddethe be the contre.