And at Cayre besides Babyloyne duelled the Calyffee of Egypt. And at Marrok, upon the west see, duelte the Calyffee of Barbaryenes and of Affrycanes. And now is there non of the Calyffeez, ne noughte han ben, sithe the tyme of Sowdan Sahaladyn. For from that tyme hidre, the Sowdan clepethe him self Calyffee. And so han the Calyffeez y lost here name. Also wytethe wel, that Babylone the lesse, where the Soudan duellethe, and at the cytee of Cayr, that is nyghe besyde it, ben grete huge cytees manye and fayr; and that on sytt nyghe that other. Babyloyne sytt upon the ryvere of Gyson, somtyme clept Nyle, that comethe out of Paradys terrestre. That ryvere of Nyle, alle the zeer, whan the sonne entrethe in to the signe of Cancer, it begynnethe to wexe; and it wexethe alle weys, als longe as the sonne is in Cancro, and in the signe of Lyoune. And it wexethe in suche manere, that it is somtyme so gret, that it is 20 cubytes or more of depnesse; and thanne it doth gret harm to the godes, that ben upon the lond. For thanne may no man travaylle to ere [Footnote: Plough.] the londes, for the grete moystness: and therefore is there dere tyme in that contree. And also whan it waxethe lytylle, it is dere tyme in that contree: for defaute of moysture. And whan the sonne is in the signe of Virgo, thanne begynnethe the ryvere for to wane and to decrece lytyl and lytylle; so that whan the sonne is entred into the signe of Libra, thanne thei entren betwene theise ryveres. This ryvere comethe rennynge from Paradys terrestre, betwene the desertes of Ynde; and aftre it smytt unto londe, and rennethe longe tyme many grete contrees undre erthe: and aftre it gothe out undre an highe hille, that men clepen Alothe, that is betwene Ynde and Ethiope, the distance of five moneths journeyes fro the entree of Ethiope. And aftre it envyronnethe alle Ethiope and Morekane, and gothe alle along fro the Lond of Egipte; unto the cytee of Alisandre, to the ende of Egipte; and there it fallethe into the See. Aboute this ryvere, ben manye briddes and foules, as sikonyes, that thei clepen ibes.