Egypt is a long contree; but it is streyt, that is to seye narow; for thei may not enlargen it toward the desert, for defaute of watre. And the contree is sett along upon the ryvere of Nyle; be als moche as that ryvere may serve be flodes or otherwise, that whanne it flowethe, it may spreden abrood thorghe the contree: so is the contree large of lengthe. For there it reyneth not but litylle in that contree: and for that cause, they have no watre, but zif it be of that flood of that ryvere. And for als moche as it ne reynethe not in that contree, but the eyr is alwey pure and cleer, therfore in that contree ben the gode astronomyeres; for thei fynde there no cloudes, to letten hem. Also the cytee of Cayre is righte gret, and more huge than that of Babyloyne the lesse: and it sytt aboven toward the desert of Syrye, a lytille above the ryvere aboveseyd. In Egipt there ben 2 parties; the Heghte, that is toward Ethiope; and the Lowenesse, that is towardes Arabye. In Egypt is the lond of Ramasses and the lond of Gessen. Egipt is a strong contree: for it hathe manye schrewede havenes, because of the grete Roches, that ben stronge and daungerouse to passe by. And at Egipt, toward the est, is the rede see, that durethe unto the cytee of Coston: and toward the west, is the contree of Lybye, that is a fulle drye lond, and litylle of fruyt: for it is over moche plentee of hete. And that lond is clept Fusthe. And toward the partie Meridionalle is Ethiope. And toward the Northe is the desart, that durethe unto Syrye: and so is the contree strong on alle sydes. And it is wel a 15 journeyes of lengthe, and more than two so moche of desert: and it is but two journeyes in largenesse. And between Egipt and Nubye, it hathe wel a 12 journees of desert. And men of Nubye ben Cristene: but thei ben blake as the Mowres, for grete hete of the sonne.