"Weel, you see, sir, I says to them, 'It will be lang afore the deil intermeddle wi' as serious a professor, and as fervent a prayer as my master, for, gin he gets the upper hand o' sickan men, wha's to be safe?' An', what think ye they said, sir? There was ane Lucky Shaw set up her lang lantern chafts, an' answered me, an' a' the rest shanned and noddit in assent an' approbation: 'Ye silly, sauchless, Cameronian cuif!' quo she, 'is that a' that ye ken about the wiles and doings o' the Prince o' the Air, that rules an' works in the bairns of disobedience? Gin ever he observes a proud professor, wha has mae than ordinary pretensions to a divine calling, and that reards and prays till the very howlets learn his preambles, that's the man Auld Simmie fixes on to mak a dishclout o'. He canna get rest in Hell, if he sees a man, or a set of men o' this stamp, an, when he sets fairly to work, it is seldom that he disna bring them round till his ain measures by hook or by crook. Then, Oh! it is a grand prize for him, an' a proud Deil he is, when he gangs hame to his ain ha', wi' a batch o' the souls o' sic strenuous professors on his back. Aye, I trow, auld Ingleby, the Liverpool packman, never came up Glasco street wi' prouder pomp when he had ten horse-laids afore him o' Flanders lace, an' Hollin lawn, an' silks an' satins frae the eastern Indians, than Satan wad strodge into Hell with a packlaid o' the souls o' proud professors on his braid shoulders. Ha, ha, ha! I think I see how the auld thief wad be gaun through his gizened dominions, crying his wares, in derision, "Wha will buy a fresh, cauler divine, a bouzy bishop, a fasting zealot, or a piping priest?" For a' their prayers an' their praises, their aumuses, an' their penances, their whinings, their howlings, their rantings, an' their ravings, here they come at last! Behold the end! Here go the rare and precious wares! A fat professor for a bodle, an' a lean ane for half a merk!' I declare I trembled at the auld hag's ravings, but the lave o' the kimmers applauded the sayings as sacred truths. An' then Lucky went on: 'There are many wolves in sheep's claithing, among us, my man; mony deils aneath the masks o' zealous professors, roaming about in kirks and meetinghouses o' the land. It was but the year afore the last that the people o' the town o' Auchtermuchty grew so rigidly righteous that the meanest hind among them became a shining light in ither towns an' parishes. There was naught to be heard, neither night nor day, but preaching, praying, argumentation, an' catechising in a' the famous town o' Auchtermuchty. The young men wooed their sweethearts out o' the Song o' Solomon, an' the girls returned answers in strings o' verses out o' the Psalms. At the lint-swinglings, they said questions round; and read chapters, and sang hymns at bridals; auld and young prayed in their dreams, an' prophesied in their sleep, till the deils in the farrest nooks o' Hell were alarmed, and moved to commotion.